Accessibility links

Кайнар хәбәр

Başqortstan Tatar ictimağıy üzäge eşçänlegen tıyarlarmı?


Rusiä Yüstitsiä ministrlığınıñ Başqortstan buyınça idaräse respublikta eşläp kilüçe qayber partiälär bülekläreneñ häm milli-ictimağıy oyışmalarnıñ eşçänlegen tıyu mäsäläsen tikşerü öçen mäxkämä orğannarına möräcägätlär cibärä başlağan. Başqortstan Tatar ictimağıy üzäge eşçänlegen tıyu mäsäläsen tikşerü kiräklegen sorap, şundıy uq möräcägätne älege idarä citäkçese Kilmyäqov äfände Ufanıñ Kirov rayonı mäxkämäsenä yullağan. Bu xaqta Başqortstan Tatar ictimağıy üzäge räise Ayrat Ğiniätullin xäbär itte. Anıñ süzlärençä, äle Kirov rayonı mäxkämäsennän bernindi dä çaqıru cibärelmägän. Ä menä Kilmyäqov äfände citäklägän idarä adresı belän xat kilep töşkän Tatar ictimağıy üzäge citäkçesenä. Anda ictimağıy üzäkneñ mäxkämä aşa yabıluı ixtimallığı turında kisätelgän. Ämma Ayrat Ğiniätullin respublik xoquq sağında toruçılarnıñ mondıy adımğa uq baruına, yağni bernindi nigezsez, Tatar ictimağıy üzäge eşçänlegen tıyu mömkinlegenä bik ışanmıy. «Monıñ öçen nıqlı dälillär kiräk iç, – di Ayrat äfände. – Ä bezneñ qanunsız bernindi ğämällär dä qılğanıbız yuq».

Şulay da älege mäsälädä Başqortstan Tatar cämägätçelek oyışmaları berlege räise urınbasarı, professor Mäcit Xucin pessimistik qaraşta tora. «Başqortstan şartlarında tege yäki bu partiä bülegen yä bulmasa, ictimağıy oyışmanı bernindi dälillärsez dä yabıp quyuları ixtimal, – di Mäcit äfände. – Başqa tatar milli oyışmaları eşçänlegen dä, törle uydırma säbäplär tabıp, tıyarğa mömkinnär».

Küplär xäterli bulır, Başqortstannıñ küptän tügel eşli başlağan yaña proqurorı Qonowalov, Ufadağı şaw-şulı mitinglarğa reaqsiä yözennän, «respublikta oppozitsiä köçlärenä kerüçe qayber milli häm ictimağıy oyışmalarnıñ eşçänlege tuqtatılırğa mömkin», dip beldergän ide. Anıñ şul belderüen Rusiä Yüstitsiä ministrlığınıñ Başqortstan buyınça idaräse ğämälgä aşıruğa yul aça başladı dip añlarğa kiräk.
XS
SM
MD
LG