“Berdäm Räsäy” firqäse häm hönäri berleklär oyıştırğan çara Watan suğışında häläk bulğannar häykäle yanında uzsa, KPRF oyıştırğanı – Ölkä administratsiäse binası qarşında, Lenin häykäle yanında.
“Berdäm Räsäy”, “Xezmätçän Räsäy” firqäläre, Räsäy patriotları berlege, suğış veterannarı häm başqa patriotik oyışmalar qatnaşqan mitingta “V. V, Putinnıñ säyäsi kursın yaqlıybız!”, “Putin, çigenmä, bez siña ışanabız!” kebek şiğar'lär belän rättän, “Xakimiät! Bezneñ taşlamalar tamağıña utırmasın!” kebek kisätülär dä bar ide. Ä KPRF, NBP, “Rodina” firqäläre, Xezmätçän Ul'nowsk, Armiäne yaqlaw xäräkäte, Sovet xatın-qızları berlege oyıştırğan çarada şiğer'lär, berdäm räweştä, xakimiätne sügälär. Berniçäse: Putin reformaların cähännämgä!, Rossiä – bez Putina!, Azatlıq yäki ülem!, Xakimiätne alıştırıyq, Räsäyne torğızıyq! Häm başqa şularğa oxşaş bixisap şiğer'lär.
İñ yögänsez çığışlar Limonovnıñ Milli bol'şeviklarnäqä buldı. Üzbäkstannan qaytqan Nail isemle beräw Putinnı xätta Amerika häm Ğäräp illäre imperializmnarına xezmät itüdä ğayıpläde. Dimäk, revolyutsiä kiräk.
Emblemaları da qorallı suğışqa öndi: Qızıl yäşlär simvolı - qızıl yoldız östendäge Kalaşkinov avtomatı. “AQM belän qarşı tor!” digän listovka da taratıp yördelär alar. NBP tarafdarları fikerençä, alarnıñ firqäsenä saf urıs qanlılar ğına tügel, başqa millätlär wäkilläre dä kerä ala, läkin urıs telen üz tele itep sanaw häm Räsäy tarixı belän ğorurlanu häm anıñ öçen canı fida bulu şartı belän. Häm andıylar üzlären urıs dip sanarğa tieş. Qalğannarı – rossiännär genä. Kiläçäktä alar da urıs bulaçaqlar.
Miting qabul itkän rezolyutsiädä Putinnan säyäsäten üzgärtü, Çubays, Gref, Zurabov, Kudrin, Fursenko kebek ministrlarnı eşennän qua, alarnıñ milken tartıp alıp sudqa birü, Däwlät Dumasın quıp taratu taläp itelä.
“Azatlıq” radiosı, Ayrat İbrahim, Sember.
