Tatarstannıñ 1992 yılda tözelgän Mäğärif näşriäte – respublikada ğına tügel, xätta Rusiädä dä iñ ere milli näşriätlärneñ berse bulıp sanala. Anda eşläwçelär üzlären milli mäğärif maqsatlarına xezmät iü öçen 1901 yılda açılğan Mäğärif näşriäteneñ warisları, dip sanıylar. Bügen Azatlıq radiosınıñ Qazan byurosında qunaqta – älege näşriätneñ citäkçese Mödärris Wäliev. Bez anıñ belän Mäğärifneñ eşçänlege, tatar kitabı, anı buldıruda, satuda tuğan problemalar turında söyläşäbez.
Mödäris äfände, Azatlıq radiosı tıñlawçıların näşriätneñ bügenge köne belän tanıştırıp kitegez äle
Yılğa bez 130-140 kitap millionnan artıq tiraj belän çığa. Bezneñ näşriättä däresleklär, şul isäptän, yuğarı mäktäp öçen dä, süzleklär, fänni kitaplar, balalar öçen ädäbi kitaplar dönya kürä. Läkin alarnı satuğa kilgändä, eşlär ciñel tügel. Bäyäläre yuğarı bulmasa da, tatar telendä çıqqan kitaplarnı satu bik qatlawlı. Bez inde üzebezçä tırışabız. Şähär üzägendäge ber kitap kibetenä Mäğärif näşriäteneñ kibete dip yazıp eldek, bu döreslekkä turı kilmäsä dä. Keşelär qızıqsınıp kerep, qarap, berär kitap alıp çıqmaslarmı dip. Daimi räweştä tatar matbuğatı aşa üzebezdä basılğan yaña kitaplar turında mäğlümätlär citkerep torabızMödäris äfände, sezneñ töp eş yünäleşegez – tatarça däresleklär bastıru. Sez inde küp yılar däwamında alarnı respublika mäktäpläre öçen genä tügel, çit töbäktäge uqu yortları öçen dä näşer itä idegez. Xäzer bu ölkädä eşlär niçek tora?
Bu ölkädä eşlär yıldan-yıl naçaraya bara. Elek böten tatar mäktäplärenä däresleklärne häm kitaplarnı Tatarstan näşer itep tarata ide. Şulay itep, tatar mädäniäteneñ, tatar mäğärifeneñ ber böten tirälege buldırıla ide. Mäğärif näşriäte açılğan yıllarda bez Rusiäneñ 64 töbägenä kitaplar häm däresleklär cibärä idek. Xäzer isä här töbäk däresleklärne dä üze näşer itärgä teli. Başqortstan respublikası, mäsälän, tatar telendäge däresleklärne inde bastıra da başladı. Rusiä töbäklärennän tatar däreslekläre turında bezgä möräcäğät itüçelärneñ sanı haman kimi bara. Bu bezneñ ğomum tatar mäğärif sistemasın cimerä Sez Tatarstannıñ Mäğärif näşriäte citäkçese Mödärris Wälievnı tıñladığız. Ul sezne näşriätneñ eşçänlege belän tanıştırdı, alda torğan problemalar xaqında söyläde. Ägär sez Mäğärif näşriäte, anda yaña basılğan kitaplar belän tanışırğa yäki alarnı satıp alırğa telisez ikän, bar mäğlümätne näşriätneñ internet säxifäsennän taba alasız. Anıñ adresı – magarif.kazan.ru. Ä Mödäris Wäliev belän äñgämäneñ däwamın sez bezneñ kiläse tapşırularıbızda işetersez.
Gölnaz İlgizär
