Accessibility links

Кайнар хәбәр

Folklor muzıka ansamble Finländiän qayttı


Başta isegezgä töşerep kitäsebez kilä, 2004 yılnıñ mayında Finländiäneñ Helsinki şähärendä dönyada berençe märtäbä canlı muzıka festivale uzğan ide. Finländiädän “Kazan Gruppası Bädretdin” yäki KGB törkeme oyıştırğan bu festivalgä Aydar Fäyzraxmanov citäklägän Tatarstan Däwlät folklor muzıkası ansamble dä, Qırımnan Änwär İzmaylov törkeme dä, Avstraliädän Zölfiä Kamalovalar da qatnaşqan ide. Xäzer bu ansamblneñ sänğät citäkçese Aydar Fäyzraxmanov belän äñgämä qorabız.

MB - Xörmätle Aydar äfände, menä sez tağın Finländiädän gastrollärdän qaytıp töştegez. 7 şähärdä çığışlar yasağanığıznı işettek, qaysı şähärlärdä çığış yasadığız? Sezne iñ şaqqattırğanı närsä buldı? Finländiädä tatar tamaşaçısı sezne niçek qabul itte? Konsertlarığızğa başqa millät wäkilläre kildelärme?

AF - Tampere şähärendä tatar diasporası bik köçle. Punkaxaryu digän iñ matur şähärdä soñğı konsertıbıznı quydıq. Bu gastrollärneñ ayırması şunda buldı, tatar sänğäten bez tatarlarğa ğına tügel, ä fin xalqına kürsättek. Häm mine iñ şaqqattırğanı, fin tamaşaçısınıñ tıñlıy belü däräcäseneñ nindi yuğarılıqta buluı buldı. Fin xalqınıñ bezgä bulğan mönäsäbäte konserttan tış waqıtlarda da sizelde. Alar bezne bik xörmät belän yaxşı-yaxşı qunaqxanälärgä urnaştırdılar, bik yuğarı däräcädä qunaq ittelär.

MB - Aydar äfände, sezne Finländiädä şähär uramnarında tanımıylarmı soñ?

AF - Alar bik xäbärdar. Azatlıq radiosın da tıñlıylar, “Yaña ğasır” televideniesen dä qarıylar. Min alıp barğan “Cırlıyq äle” tapşıruı turında andağı tatarlar kilep äytkäç, miña bik zur açış buldı.

MB - Şul tamaşaçını sixri moñğa törüdä, tatar xalqınıñ folklorın yuğarı professional däräcägä kütärüdä sezgä kemnär yärdäm itä?

AF - Bu barı tik ezlänülärneñ näticäse. Min küp kenä folklorçılar belän elemtädä yäşim. Qotdus Xösnullin, İlgiz Qadıyrov häm başqa folklorçılar belän. Küñelemä oşağan xalıq cırları bula ikän, eläkterep alam da, kompozitor Mars Kaşipov häm arancirovçik İlfat Däwlätşin belän bik tığız elemtädä toram. Annarı eş kilep citä bezgä. Yärdämçelärem Xalisä Şärapova, xormeyster Fatıyma Axmadeeva, orkestr citäkçem Ğäli Niazov. Häm bez dürtäwläşep bergä, qulğa-qul totınışıp eşläp, äsärlärne şulay säxnägä quyarlıq itep äzerlibez.

Asıl mirasıbıznı, milli moñnarıbız, ğöref-ğadätlärebez, uyın yolalarıbıznı torğızıp, tuplap, yañadan xalqıbızğa ireşterüçe ansamblneñ sänğät citäkçese Aydar Fäyzraxmanov belän äñgämä tıñladığız.

Mälikä Basıyr, Qazan

XS
SM
MD
LG