Accessibility links

Кайнар хәбәр

Prezident Bush Litva, Latviä häm Estoniä citäkçeläreneñ Ciñü köne turındağı qaraşı belän kileşä


Amerika Quşma Ştatları prezidentı Bush İkençe dönya suğışı tämamlanuınıñ 60 yıllığın bilgeläw tantanalarında qatnaşu öçen Yevropağa kilde. Bügen ul Latviädä, häm anda ul bu ilneñ genä tügel, qalğan Baltiq buyı däwlätläreneñ prezidentları belän dä oçraştı. Aña qädär Latviä prezidentı Vaira Vike-Freiberga belän oçraşqanda George Bush şul ilne azatlıq aldınğısı dip atadı.

Başqala Riganıñ urta ğasır kirmänendä uzğan tantanada prezident Vike-Freiberga amerikan citäkçesenä Latviäneñ iñ olı bülägen - Öç yıldız ordenın tapşırdı. Aña qädär latış prezidentı Bushnıñ üz ilenä kilüe, monıñ ähämiate turında bolay digän ide:

Audio, Vaira Vike-Freiberga

"Baltiq buyı illärenä kilep prezident Bush xäzer bilgelängän tarixi waqiğälärneñ mäğnäsenä, ike törle mäğnäsenä basım yasıy dip uylıym. 60 yıl elek suğışnıñ tämamlanuı küplär öçen azatlıqnı añlatqan ide. Ämma başqalar öçen bu qollıqnı da añlattı, basıp alunı, buysındırunı häm Stalin terrorın añlattı" dip beldergän ide Latviä prezidentı. Şulay itep Bushnıñ Latviägä kilüe, anıñ Yevropa säfäre Ciñüne tantana itüdän kiñräk säyäsi mäğnägä iä buluın kürsätä. Yulğa çığıp kitär aldınnan ul üze dä Mäskäwgä barğaç Rusiä prezidentı Vladimir Putingä, 60 yıl elek Yevropada suğışnıñ tämamlanuı Baltiq buyı illärenä ireklek alıp kilmäwen äytäçägen beldergän ide. Şimbä könne Baltiq buyındağı öç däwlät - Litva, Latviä häm Estoniä prezidentları belän oçraşqannan soñ Bush, mädäniatle dönyanıñ german natsiların tar-mar itüe, şul çordağı buyınnıñ ireklek wä tınıçlıq öçen qorban kiterüe ähämiaten tağın ber qabatlasa da, 60 yıl elek bulğan waqiğäne beryaqlı ğına bäyälämäwen dä äytte:

Audio, George Bush

"Ämma min berük waqıtta, Könbatışta suğış betüeneñ çın ireklekkä kiterüen, ä menä Baltiq buyına monıñ basqınlıq häm kommunistik izü kiterüen dä tanıym. Amerikan xalqı monı berqayçan da onıtmayaçaq, bez sezneñ ärnüle tarixığıznı tanıybız" di amerikan prezidentı George Bush. Baltiq buyı illäre xäzer Rusiäneñ, Sovetlar berlege warisı bularaq, üzlären basıp aluı öçen täwdä kiterüen taläp itä. Alarnı xäzer bu mäs''älädä Yevropa Berlegeneñ qayber citäkçeläre dä yaqlıy. Mäğlüm ki, Litva, Latviä häm Estoniä Yevropa Berlegenä kerä. Ämma räsmi Mäskäw Baltiq buyı illäreneñ şuşı däğwasın kire qağa, ğomumän, bernindi basıp alu da bulmadı dip belderä häm üz yağınnan şuşı öç ilne, natsilar belän xezmättäşlek itkän watandaşların qaharman yasarğa tırışuda ğäyepli. Älege qarşılıqlar Litva häm Estoniä prezidentlarınıñ düşämbedä Mäskäwdä uzaçaq tantanalarğa barudan baş tartuına kiterde. Anda Latviädän prezident Vike-Freiberga ğına bulaçaq. Häm anda, älbättä, Quşma Ştatlar prezidentı Bush ta qatnaşaçaq, ämma aña qädär ul şimbä kiçen Rigadan Hollanqa kitep, anda suğışta hälak bulğannar ziratına baraçaq. Mäskäwdän amerikan prezidentı Gruziä başqalası Tifliskä yul totaçaq.

Kärim Kamal
XS
SM
MD
LG