Accessibility links

Кайнар хәбәр

Tatarstanda bäyrämnär çorı başlanıp kitä


Ciñü könenä bağışlanğan tantanalar ütep kitte. Ämma küp tä ütmi, yaña bäyrämnär kilep citäçäk. Ber atnadan, Tatarstanda, matbuğat köne häm anıñ qısalarında Media-forum bulaçaq. Respublika jurnalistları häm çittäge tatar basmaları xäbärçeläre, Qazanda cıyılıp, tatar matbuğatınıñ 100 yıllıq tantanasında qatnaşaçaq. Berençe tatar gäzite çıqqanğa, ber ğasır waqıt ütkän. Şuşı waqiğa uñayınnan Qazanda fänni konferensiäne ütkärergä äzerlänälär. Annan soñ, Qazanda, matbuğat bäyräme ütkärelergä tieş. Bar teläweçlär, ber köngä genä oyıştırılğan matbuğat uramınnan ütep, yaratqan basmaları belän yaqınnanraq tanışa alaçaq, gäzitlärgä yazılu da şunda uq oyıştırılır, dip kötelä. Ä 19 mayda, Tatarstan matbuğat könendä, «Bällür qäläm» bäygesendä ciñüçelärne büläkläw planğa kertelgän. «Tatarstan dulqınında» digän festivalne uzdıru da, şul uq waqıtqa bilgelängän. Anda da respublika, tele häm radio jurnalistları hönär ostalıqların sınarğa cıyna. Anda da bäyräm, büläklär öläşü bulaçaq.

«Karavon» urıs fol’klor muzıka festivale häm tatar milli Saban tuyı bäyrämeneñ ütkärelü köne dä bilgele buldı. Bu xaqtağı qararlar matbuğatta basılıp çıqtı. Karavon, Laeş rayonınıñ Russkoe-Nikolskoe awılındağı bäyräm 21nçe mayğa bilgelängän. Bäyrämne oyıştıru eşe Tatarstan xökümätenä häm cirle xakimiätlärğä yöklänä, dielä Prezident boyırığında. Şundıy uq kürsätmä, Saban tuyın ütkärü turında da birelä. Awıllarda häm rayon üzäklärendä milli bäyräm 4-5nçe iyundä, Yäşel Üzän häm Tübän Kamada 18 yun, Çallıda – 19-nda, Qazan Saban tuyı isä 25 nçe mayda ütkärelergä tieş.

Ber kön aldan, 24nçe yündä, Qazanda, Qol Şärif mäçeten açu tantanası kötelä. Ul comğa kön bulaçaq. Qazannıñ iñ zur mäçeten açu tantanasın däwlät bäyräme däräcäsendä ütkärü turında da Prezident boyırığı bar. Anda äytelgänçä, bäyrämgä islam däwlätläre citäkçeläre çaqırılğan. Kiläse qunaqlarnıñ sanı şul xätle küp ki, mäçetkä bar telägän keşe sıymasa, bäyräm namazı Yärminkälär mäydanında uqılırğa mömkin.

Ä annan soñ, tağın ber ay ütkäç, 21nçe iyuldä, Blagoveşenie soborınıñ yañartu eşlärennän soñ açılu tantanası ütkärelü kötelä. Ul waqıtta, Qazan yeparxiäseneñ 450 yıllığı da bäyräm itelergä tieş ikän. 21nçe iyul, şunıñ östäwenä, Qazan izge Ana ikonası tabılğan kön bulıp sanala, dip xäbär itä räsmi çığanaqlar. Bu bäyrämgä, Rusiä pravoslav çirkäwe başlığı Aleksiy İİnçe da çaqırılğan.

İnde ütep kitkän bäyrämnärdän kürengänçä, Qazannıñ 1000 yıllığına yaqınlaşqan sayın, iminlek çaraları qırıslana bara. Şuña, xörmätle tıñlawçılar, yallar häm eş säfärläre turında plan qorğanda, yullarnıñ yabıluı, bäyräm bulası urınnarğa yaqın kilep bulmawı häm şäxes tanıqlığın tikşerü kebek, qıyınlıqlarğa oçrawnı farazlap bula.



Bikä Timerova.

XS
SM
MD
LG