Qazannıñ meñyıllığına äzerlek şähärneñ üzendä genä tügel, başqa Rusiä töbäklärendä dä bara. Çärşämbe könne Qazannıñ xakimiät başlığı Kamil İsxaqov citäkçelegendäge delegatsiä Sankt-Peterburgka kitte. Anda tatarstanlılar respublika başqalasınıñ yubileyına piterburlılarnıñ äzerlege xaqında söyläşäçäk. Qazan Sankt-Peterburgnıñ 300 yıllığın bilgeläp ütkändä üzeneñ öleşen kertkän ide. Qunaq aşı – qara qarşı digändäy, xäzer inde tönyaq başqalanıñ da bezgä yärdäm itärgä çiratı kilep citte.
18 mayda Qazanda da xalıqara muzeylar könen bilgeläp üttelär. Şuşı data uñayınnan yıldağıça Milli muzeynıñ qayber kürgäzmälärenä, Salix Säydäşev, Maksim Gor’kiy muzeylarına telägän keşelär tüläwsez kerep tanışa aldı. Qazannıñ Kreml’ uramında Xalıqara muzeylar könenä bağışlanğan İske Qazanğa säyäxät digän konsert ta uzdı. Tatarstannıñ Mädäniät ministrlığı şuşı könnärdä respublikadağı 100 muzey arasında uzğan bäygeneñ näticälären dä iğlan itte. 2004 yılnıñ iñ äybätläre bulıp şähärlär arasında Tübän Kamanıñ Nefteximiä, ä awılnıqılar arasında – Baltaç rayonınıñ Xalıqlar duslığı muzeyları tanılğan.
Läkin, qızğanıçqa qarşı, küpçelek qazanlılarnı bu aralarda muzeylar tügel, ä su probleması borçıy. Küp kenä yortlarda inde berniçä kön, qaydadır xätta atna da, qaynar su yuq. Çärşämbedän başlap isä berniçä köngä başqalanıñ 3 rayonında salqın sunı da betereläçäge turında xäbär ittelär. Qazannıñ Sovet, İdel buyı häm Waxitov rayonnarında yäşäwçelärgä su maxsus maşinalarda kitereläçäk.
Qazannıñ qayber cirlärendä su bulmasa da, tormış şaqtıy aktiv bara, bersennän-berse qızıqlı, möhim çaralar ber-ber artlı ütep kenä tora. 17 mayda Qazanda Respublika matbuğatı köne uñayınnan Media-forum açıldı. Anıñ qısalarında çärşämbe könne Bötendönya tatar kongressı binasında Tatar internetınıñ III forumı uzdı. Çärşämbe könne şuşı uq Media-forumda respublika mäğlümät çaraları citäkçeläreneñ Tatarstan däwlät oyışmalarınıñ matbuğat üzäkläre wäkilläre belän oçraşuları da buldı. Alar üzara xezmättäşlek turında söyläşte. Şul uq könne Qazanda töbäk teleradiokompaniäläreneñ Tatarstan dulqınında dip isemlängän VIII festivale dä açıldı. Ä Tatar-inform agentlığında isä 19 may – Tatarstan matbuğatı köne uñayınnan Tatmedia agentlığınıñ citäkçese Marat Moratov belän söyläşü uzdı.
Gölnaz İlgizär
