Accessibility links

Räfqät Zaripov : Baltaç rayonınıñ keçkenä awıllarında da internet bar


Ütkän tapşıruıbızda, «Abağa çäçäge» digän olimpiada häm şuña bağışlanğan sayt turında söylägän idek. İnde bu könnärdä, älege saytnı yasağan keşelärneñ berse, Tüntär awılı mäktäbeneñ fizika häm informatika uqıtuçısı Räfqät Şäkür ulı Zaripov üze «Azatlıq» radiosı studiäsenä kilep kerde. Ul bügeneñ «Tatnet» tapşıruınıñ qunağı bulaçaq, xäzer anıñ belän äñgämäne sezneñ iğtibarğa täqdim itäbez.

«Min «Azatlıq» radiosı belän min küptän tanış, anı berençe tapqır 50 yıl elek işetkän idem. «Tatnet» tapşıruı da miña oşıy, çönki internettan başqa kiläçäk tormışnı küz aldına kiterep bulmıy. Ber 10 yıldan, här zıyalı keşeneñ öyendä kompyuter bulaçaq, alar internetqa totaşaçaq, bez elektron poçta häm başqa programmalar yärdämendä aralaşıp yäşärbez, dip küz aldına kiteräm.»

Räfqät Zaripov, bezneñ belän kiläçäk turındağı xıyalları belän büleşte. Ä xäzergä isä, här keşeneñ öyendä kompyuter häm internet buluı turında äytergä irtäräk. Ämma, Baltaç rayonınıñ mäktäplärendä, bu texnologiälär alğa kitkän kiläçäkkä taba adımnar yasıylar, dip äytep bula. İnformatika uqıtuçısı Räfqät Zaripov belän söyläşüne däwam itäbez. Ul bezgä niçek sayt yasawı xaqında söyläde. Äytkänebezçä, Räfqät äfände tırışlığı belän internetta www.abaga2000.narod.ru digän internet säxifä eşläp kilä. Anda «Abağa çäçäge» digän texnik fännärdän ütkärelä torğan programma materialları urnaştırılıp bara. «Sayt Sosna awılı yegete, Almaz Fäyzraxmanov yärdäme belän eşlände, min aña materiallarnı cibärdem, ul üze yasağan saytqa ul materiallarnı ürnaştırdı», dip söyläde Räxqät abıy. Ul üze, 60nı uzğan keşe, berençe tapqır kompyuterda eşlärgä 50 yäştä öyränä başladım, di. İnternet belän dä eşläw serlärenä dä töşengän, şuña awıldağı uquçılarnı da öyrätä. Zamança texnologiä yärdämendä xäzer Baltaç mäktäpläreneñ arası yaqınayğan di. Räfqät abıy äytkänçä, rayondağı 21 mäktäptä internet bar, alar uz arala elektron poçta aşa aralaşa, mäğärif bülekläre belän dä, qazan belän dä internet aşa elemtädä toru caylıraq, dip sanıy uqıtuçılar. İnternetqa çığıp, mäktäplären tanıtu eşendä, iñ berençelär bulıp, Norma mäktäbe buldı dide Räfqät Zaripov. Ul mäktäp turında, www.normaschool.pochta.ru adresında urnaşqan saytta belep bula. Anı şuşı mäktäp uquçıları, uqıtuçıları eşlägän. Qunağıbız, informatika uqıtuçısı Räfqät äfände äytkänçä, yäşlär yaña texnologiälärne bik tiz öyränälär, öylärendä kompyuterlar alıp, internetqa çığalar, mäktäp programmasında qaralğan 2-3 säğättä bu eşne nıqlap öyränep bulmıy, dide ul. Xäzer keçkenä awıllarda da internetqa totaşqan komputerlar bar. Keşelär öylärenä quydıra, dip söyläde Rifqät abıy.

Ägär sez dä, yäşägän töbägezdä internetnı üzläşterü täcribäse turında söylärgä teläsegez, räxim itep, bezgä xatlar yazığız, şaltıratığız. Telefon –(8432)705247, e-xat – bike@azatliq.ru.



Bikä Timerova.

XS
SM
MD
LG