Accessibility links

Кайнар хәбәр

Tatarstan sabantuyğa äzerlänә


Tatarnıñ zur milli bäyräme sabantuy qayda häm niçek uzdırılaçaq digän sorawlarğa cawapnı sişämbe könne ministrlar kabinetında uzğan matbuğat oçraşuında işetergä mömkin ide. Cıyılışta ministrlar kabinetınıñ apparat citäkçese urınbasarı Räşidä Väliullova, mädäniät ministrlığı wäkile Zöl'firä Salixova, Bötendönya tatar kongressı Başqarma Komitetı räise Rinat Zakirov buldı.
Respublika prezidentı Mintimer Şäymiev qararı buyınça Sabantuy bäyräme Tatarstannıñ rayon-awıllarında 4-5 iyündä, Yäşel Üzän, Tübän Qamada 18, Çallıda 19, ä Qazanda 25 iyündä ütkäreläçäk. Bıyıl Sabantuynı Rusiäneñ 59 töbägendä ütkärü dä küzdä totıla. Töbäklärdän soñ 2 iyüldä Tübän Novgorodta 4нче Federal' Sabantuyı bula. Anda Rusiäneñ törle töbäklärennän 450 delegat qatnaşa. Häm tatarnıñ zur milli bäyräme şulay uq Gretsiä, Çexiä, Törkiä Litva, Latviä kebek çit illärdä dä ütkäreläçäk. Yıl sayın Sabantuynı uzdıruçı töbäklär sanı arta häm şunısı möhim älege bäyrämne Bötendönya tatar kongressı aşa tügel, ä üz mömkinçelekläre belän uzdıruçı töbäklär kübäyä. Bıyılğı Federal' Sabantuynı oyıştıruğa sarıf iteläçäk çığımnarnı, mäsälän, tulısı belän milli eşmäkärlär qaplarğa cıyına. Sabantuylarnı ütkärü öçen respublikanıñ mädäniät ministrlığı bıyıl ber million sum aqça bülgän.
Ğomumän sabantuylarğa äzerlek inde tämamlanğan dip xäbär itelde ministrlar kabinetında ütkän cıyılışta. Qazan xäzer çit illärdän 500läp qunaq kötä. Ämma älegä bu qunaqlarnıñ isemlege kiñ cämäğätçelek öçen ser bulıp qala. Bıyılğı Sabantuynıñ tağın da canlıraq, küñelleräk häm kiñräk ütkärelüe 24 iyündä Qol Şärif mäçeteneñ açıluı belän bäyle. Bu uñaydan Tatarstan başqalasına böten Rusiädän islam dine ähelläre, näzäriät citäkçeläre çaqırılğan.
Küptän tügel ğalimnär Sabantuy bäyrämeneñ ber ğasırlıq tarixına tap buldı. İke yıl elek Älki rayonında Sabantuy bäyräme könne ülgän keşeneñ qäber taşı tabıldı. Älege taş milli tatar bäyrämeneñ 1120nçe yılda da buluın xäbär itä.
Şulay itep bıyıl Tatarstan häm Rusiä töbäklärendä Sabantuy ütkärügä zur iğtibar birelä. Çönki Tatarstan başqalasına meñ yıl tulğanda tatar xalqınıñ milli bäyräme böten dönyanıñ iğtibarın cälep itäçäk. Mondıy cıyılışlarda ğadi awıllarda ütä torğan iñ keçkenä sabantuylarnı oyıştırğanda nindi köçlär tügelüe turında äytelmi. Awıl keşeläre üzläre buldırğan qädär tırışa. Tıynaq häm ällä ni şaw-şusız ütkärelä torğan mondıy sabantuyları şul awıl keşese öçen bik möhim häm qäderle. Dönyanıñ ruxi mirası, şedevrlarına menä şundıy tabiği bäyrämnäre kiräk.
Al'bina Zäynulla, Qazan.
XS
SM
MD
LG