Accessibility links

Başqortstan tatarları qorıltayın ütkärü urını tabılırmı?


Başqortstan tatarları qorıltayın ütkärü öçen bina mäsäläse tağın da zur problemağa äylänä kebek. Respublika citäkçelege bu qorıltay öçen bina birmäyäçäge turında beldergän. Mäğlüm buluınça, Başqortstan milli oyışmaları 22 yün könne respublika tatarlarınıñ zur qorıltayın ütkärergä äzerlänä. Ul bıltır noyäbr ayında Mäskäwdä uzğan qorıltaynıñ ikençe öleşe bulaçaq dip belderelgän ide. Menä şul qorıltaynı Ufada ütkärü öçen, Başqortstan Tatar cämägätçelek oyışmaları berlege uzğan atnada uq Başqortstan prezidentı Mortaza Räximov isemenä xat yazğan. Bu atnada ul xatqa nindi dä bulsa cawap kötelgän ide. Ämma yazma räweştä bernindi cawap ta alınmağan. Başqortstan Tatar cämägätçelek oyışmaları berlege räise Ramil Bignov xäbär itüençä, Prezident xaqimiäte xezmätkärläre Mortaza Räximovnıñ bu qorıltayğa bina birügä rizalığı bulmawı turında telefon aşa ğına citkergän. Şulay itep Başqortstan tatarları üz qorıltayı öçen bu yulı da räsmi xaqimiätlärdän Ufadağı qaysı da bulsa binanı ber köngä arendalaw öçen röxsät aluğa ireşä almadı. «Monıñ şulay bulaçağın bez aldan uq farazlağan idek inde, – di Ramil Bignov. – Respublik citäkçelege tatar milli oyışmaları belän söyläşülär başlarğa, aralaşırğa häm añlaşuğa haman da äzer tügel. Ä Ufadağı zur mädäniät sarayları direktorları üzläre genä tatar qorıltayı uzdıru öçen bina birergä qurqa. Çönki alar şul könne ük östän kürsätmä belän wazıyfalarınnan alınırğa mömkin». Şulay da tatar milli xäräkäte liderları Başqortstan tatarları qorıltayın barıber ütkärergä cıyına. Ramil Bignov belderüençä, bina mäsäläse dä xäl itelgän inde. Ämma ul xaqta älegä berkemgä dä mäğlümat birmilär. Qorıltaynıñ qayda ütäçägen belep qalğan respublik türäläreneñ törleçä ayaq çaluınnan şiklänä alar. İnde elek tä xäbär itelgänçä, Başqortstan tatarları qorıltayı 22 yündä motlaq ütäçäk häm anda respublika rayonnarınnan häm Ufadan cämğıse 800gä yaqın keşe qatnaşır dip kötelä. Deleğätlarğa çaqıru qäğäzläre kiläse atnada cibärelä başlıy. Qorıltayğa äzerlänü barışın tikşerü öçen kiläse atnanıñ sişämbesendä oyıştıru qomitetınıñ çirattağı utırışı täğayınlängän.
XS
SM
MD
LG