Accessibility links

Кайнар хәбәр

Rusiä: däwlät qaramağındağı Gazprom abruylı "İzvestia" gäziten satıp aldı


Comğa könne Rusiäneñ däwlät qaramağındağı Gazprom şirkäte, ilneñ iñ abruylı basmalarınıñ berse, İzvestia gäziteneñ xälitkeç 50% xissasın satıp aldı. 4 yıl elek bu şirkät NTV televideniesen üz qulına töşergän ide. Xäzer İzvestia''nıñ da Gazprom qaramağına küçüen, belgeçlär, Kremlneñ, mäglüm däräcädä bäysez sanalğan bu gäzitne awızlıqlaw tırışlığı dip bäyäli.

1917 yılnıñ 28 fivralendä oyışqan İzvestia gäzite distä yıllar buyına sovet xökümäteneñ räsmi mönbäre bulıp tordı. 1991dä, Sovetlar Berlege tarqalğannan soñ, ul bäysez basmağa äwerelde häm 380 meñ danä tirajı belän Rusiäneñ citdi basmaları arasında iñ erese sanala ide.

Comğa könne Gazpromnıñ Gazprom-Media bülekçäse eşquar Vladimir Potaninnıñ İnterros kompaniäsennän İzvestianeñ 50% xissasın satıp aluı turında belderde. Alış-bireşneñ bäyäse älegä iğlan itelmi.

İzvestia gäziteneñ Gazprom qaramağına küçüen media belgeçläre mäglümät çaraların awızlıqlaw yünäleşendä Kremlneñ çirattağı ğämäle dip bäyäli. Putin säyäsätenä tänqiti qaraş beldergän NTV televideniese 4 yıl elek näq şul Gazprom yärdäme belän "aqılğa utırtılğan" ide.

Rusiäneñ tele-radio tapşıruçılar berläşmäse vitse-prezidentı Manana Aslamazyan:

"İzvestiane qırqırlar, Gazprom-Mediağa kergän başqa mäglümät çaraları kebek ük tıñlawçan itergä tırışırlar dip qurqam."

İzvetsiäneñ elekke möhärrire Mixail Kojokin süzlärençä, bu alış-bireşneñ finans yağı da bardır, läkin ul da monı bäysez mäglümät çaraların awızlıqlaw tırışlığı dip kürä:

"Rusiädä biznes belän säyäsät butalğan. Media ölkäsendä dä şulay: biznes-qararlar säyäsät belän butalğa. bar mäglümät çaraları aqrınlap däwlät qaramağına küçä."

Gazprom-Media citäkçese Nikolay Senkeviç, İzvestiadä bulaçaq üzgäreşlär turında älegä söylärgä irtä, başta wazğiätne centekläp tikşerergäkiräk dide. Ämmä küp kenä belgeçlär, xäzer İzvestiane dä NTV yazmışı kötä dip sanıy. Gazprom qulına küçkännän soñ tanılğan "teşle" jurnalistlar kanalnı taşlap kitte, berniçä popular tapşıru yabıldı. NTV üzeneñ yözen yuğalttı. Rusiäneñ Jurnalistlar Berlege başlığı İgor Yakovenko ul çaqta Gazpromnı "NTVnı üterüdä" ğäyepläde, xäzer İzvestianeñ dä şul uq qullarğa küçüen "yaman xäbär" dip bäyäli:

"İnterrosnıñ Prof-Media bülege xakimiätkä tuğrı ide. Şuña da qaramastan, alar biznes küzlegennän çığıp, gäzitne qızıqlıraq itü yulların ezläde. Xäzer Rusiäneñ bu iñ qart häm yaxşı basmalarınıñ berse yuqqa çığa barır sıman."

İzvestianeñ Gazpromğa satıluı tiräsendä inde şaqtıy ğäybätlär taraldı. Wall Street Journal gäzite mäglümätenä qarağanda, İnterros kompaniäse Putin idaräsennän gäzitne satırğa digän färman alğan. Başqa xäbärlärgä qarağanda Potanin üze, Xodorkovski xökemennän soñ, Kremlgä yaxşı niäten kürsätergä telägän.

İnterros xujası moñarçı da "Kreml qurayın" iğtibar belän tıñlawçı oligarxlarnıñ berse ide. Uzğan yıl Beslan faciğäsennän soñ İzvestianeñ ul çaqtağı möhörrire Raf Şakirov Beslanda töşerelgän qotıçqıç sürätlärne gäziteneñ berençe bitenä bastırğannan soñ eşennän kitergä mäcbür buldı. Qayber mäglümätlärgä qarağanda bu Potaninnıñ Kremlgä yaraw tırışlığı bulğan.

Raf Şakirov bügen Exo Moskvı radiosına birgän äñgämäsendä äyütençä, Kreml televideniene östennän tulı kontrolen urnaştırdı, küräseñ monıñ belän genä qänäğät tügel, xäzer basmalarnı tazarta başlıy.

-Ali Gilmi
XS
SM
MD
LG