Änkara -- Törkiä belän Ukraina bügen energetika, timer yul, atom texnologiäse häm cinäyätçelekkä qarşı köräş ölkäsendä xezmättäşlek itü turında, barlığı 6 kileşü imzadı. Bu kileşülär Ukraina prezidentı Viktor Yuçenko'nıñ Törkiägä 3 könlek räsmi säfäre barışında imzalandı. Bügen ul Törkiä prezidentı Äxmät Necdet Sezer belän oçraştı. Sezer süzlärençä, bu kileşülär ike aradağı xezmättäşlekne köçäytügä öleş kertäçäk. Yuçenko süzlärençä, ike il arasındağı säwdä külämen 2010nçı yılğa 10 milliard dollarğa citkerü kötelä. Uzğan yıl ike aradağı säwdä küläme 3 milliard dollar täşkil itte. Törkiäneñ başqa räsmiläre belän oçraşqannan soñ Yuçenko çärşämbedä İstanbulğa kiläçäk. Söyläşülärdä şulay uq, Ukrainadağı Qırım tatarları mäsäläse dä kütäreler dip kötelä. Uzğan yıl Ukrainadağı äflisün inqilabınnan soñ prezident bulğan Viktor Yuçenkonıñ bu Törkiägä berençe räsmi säfäre bulıp tora.
