Başqortstanda milli batır däräcäsenä kütärelgän Salawat Yulayıvnıñ tuuına 251 yıl tuluğa bağışlanğan çaralar däwam itä. Comğa könne şuşı yübiley qısalarındağı iñ töp çaralarnıñ berse – respublika citäkçeläre dä qatnaşqan tantanalı utırış Ufada Başqortstan däwlät opera häm balet teatrında bulıp ütte. Anda Salawat Yulayıvnıñ başqort xalqı tarixında totqan zur urını turında küp kenä yalqınlı çığışlar buldı. Ğälimnär, başqort milli xäräkäte wäkilläre häm respublika citäkçeläre Salawat şäxesenä qağılışlı fikerläre belän urtaqlaştı.
Tantanalı utırış respublika sänğät ostalarınıñ zur konsertı belän tämamlandı. Salawat Yulayıvqa bağışlanğan tağın ber zur çara – Salawat cıyını şimbä könne Salawat rayonında ütäçäk. Anda respubliknıñ törle töbäklärennän, şulay uq Tatarstannan, Çiläbe, Perm ölkälärennän küp kenä qunaqlar da qatnaşa. Salawat cıyınında Sabantuy da, bik küp mädäni çaralar da oyıştırılaçaq. Şulay itep, Salawat Yulayıvnıñ tuğan köne xäzer här yılnı şulay bik zurlap ütkärelä. Bu xaqta uzğan yılda prezident Mortaza Räximovnıñ maxsus färmanı bulğan ide.
Fänis Fätxi, Ufa
Fänis Fätxi, Ufa
