Accessibility links

Кайнар хәбәр

Cirle üzidarä reforması matbuğat iregenä niçek täesir itä?


Milli häm mäğlümat çaraları kongressı tämamlandı. Anıñ belän bergä «Efirda mädäniät» digän mäğlümat çaraları festivale dä ütep kitte. Televidenie häm radio tapşırular festivale inde ber niçä yıl rättän ütkärelsä, matbuğat çaraları kongressı täwge tapqır ütkärelgän. Anda, xäbär ikänebezçä, Tatarstanda ğına tügel, başqa töbäktäge erele-waqlı gäzit wäkilläre qatnaştı. Kongressnıñ açılışı «Piramida» küñel açu üzägendä ütte, annan soñ ul teploxodta däwam itte. Mäskäwdän kilgän Duma deputatları da, Tatarstandağı citäkçelär dä, üz çığışlarında, regional matbuğatnıñ möhimlegenä basım yasadılar. Federal däräcädäge, ere, täcribäle, däräcäle gäzitlärgä qarağanda, uquçılarnı cirle xäbärlär birä torğan gäzitlär kübräk qızıqsındıra. Yaqındağı waqiğalar, uquçılarnıñ iğtibarın nıqlabraq cälep itä. Ämma bu mäs’äläneñ ike yağı bar. Ber qarağanda, cirle matbuğat uquçığa yaqınraq häm qızığraq, ämma, ikençe yaqtan, ul däwlät yärdämennän yäki başqa yaqtan aqça almıyça yäşi almıy. Tatarstanda, küpçelek rayon häm şähär gäzitläre respublika byudjetınnan açqa alıp eşli. Mäğlümat eşlären bağuçı «Tatmedia» agentlığı, monı däwlätneñ sotsial funksiäse, dip atıy. Milli häm balalar matbuğatı mäsälän, cämğiätkä bik kiräk, ä bu basmalar, kommersiä nigezendä eşlären alıp bara almıy. Şuña bu tör gäzitlärgä däwlät yärdäm itä. Älege mäğlümat çaraları kongressında da, dotatsiälärneñ kiräklege turında süz bardı. Bu ideanı mäğlümat çaraları üzläre dä yaqlıy, räsmi xakimiät wäkilläre dä bu eşne bik möhim, dip sanıy. Ämma gäzitlär, kem aqça birä, şunıñ cırın cırlarğa mäcbür bula, tügelme? Artında zur yaqlawçısı, kapitalı bulmağan gäzitlär, bäysez fikerle bula alamı? İrekle mäğlümat barlıqqa kilügä, cirle üz idärä sistemasınıñ cäyelep kitüe belän, az ğına ömet tua ala. Çönki, federal qanunnar belän, cirle üz idärä oyışmalarına, üz gäzitlären buldırırğa röxsät itelergä mömkin. Şundıy tözätmä xäzer, Dumada äzerlänä. Ägär ul qabul itelsä, däwlät qulındağı matbuğat belän ber üq waqıtta, mäxälä, salımnar xisabına yäşi torğan munisipal gäzitlär dä barlıqqa kilergä mömkin. Milli häm regional mäğlümat çaraları kongressında, şuşı tözätmä turında da süz barğan. Forumda qatnaşuçılar şulay uq, däwlätneñ milli säyäsäte, qanun çığaru, litsenziä alu, federal üzäktän subsidiä däğwä itü kebek mäsälälärgä qaralğan, dip xäbär itelä.



Bikä Timerova.

XS
SM
MD
LG