Accessibility links

Кайнар хәбәр

Tatar yazuçıları qorıltayların ütkärde


İsegezgä töşeräbez, bu berlek räsmi 1994 yılda terkälep, ber ay eşläp, täwge qorıltayın uzdıru belän terkälüe ğämäldän çığarılğan ide. Un yılğa yaqın waqıt eçendä 40tan artıq mäxkämä utırışı ütkärep, 2003 yılda ul qabat terkälügä ireşte.

18 yün uzğan ul çaranıñ kön tärtibenä biş mäsälä quyıldı. Berençe kön tärtibe – uzğan eşkä xisap çığışın berlekneñ räise Räif Ämirov yasadı. Ul üzgärtep-qoru cilläre isü belän mädäniät häm mäğrifätne üsterü mömkinçelekläre artuın söyläde, tatar xalqı mänfäğäte öçen başqarılğan qayber eşlärne atadı. Berlek eşçänlegenä qağılışlı iñ töp mäsälälär – küpme äğza buluı, ike qorıltay arasında berlekkä niçä keşe qabul itelüe, küpme kitap çığarıluı, nindi çaralar ütkärelüe kebek mäsälälär yaqtırtılmadı.

Başqort däwlät pedagogiä universitetınıñ tatar kafedrası mödire filoloğiä fännäre kandidatı Säğidulla Xafizov bügenge şiğriät, şul uq kafedra professorı Sufiän Safuanov proza torışı xaqında söyläde. Balalar ädäbiätı, tänqit kebek janrlar turında qorıltayda bötenläy süz bulmadı.

Qorıltaynıñ strukturası turında kön tärtibe buyınça Räif Ämiov süz alıp, berlekne Başqortstan Yazuçılar berlegenä assosiatsiä itep kertü täqdimen belderde. Şulay uq berlekne möstäqil kileş qaldıru häm Tatarstan Yazuçılar berlege bülekçäse itü kebek täqdimnär dä buldı. Älege mäsälä buyınça fiker alışuda berniçä keşe qatnaştı. Läkin bu kön tärtibe buyınça urtaq fikergä kilenmäde. Qorıltayda Qazannıñ meñellığın bäyräm itügä baru öçen yazuçılar saylandı. Ul isemlekkä barlığı 12 keşe kerde. Çarada Başqortstan tatarlar cämägätçelek oyışmaları berlege räise Ramil Bignov ta qatnaştı häm çığış yasadı. Ul berlekneñ cawaplı särkätibe wazıyfasın alıp baruçığa xezmät xaqı tülärgä äzer buluın belderde. Qorıltayda Başqortstan Yazuçılar berlegeneñ tatar berläşmäse räise Räşit Sabitov ta qatnaştı häm ul da çığış yasadı. Sabitov Tatar berlegen oppozitsiä dip atadı, anıñ awır xäldä buluın bäyäläp, berläşergä çaqırdı. Bu täqdim xuplaw tapmadı. Qorıltay niçek säyer başlansa, şulay uq tämamlandı da. Ul başlanğanda mandat, isäp-xisap komissiälär çığışları bulmadı. Berlekneñ küpme äğzası buluı, alarnıñ küpmeseneñ qatnaşuı – kvorum bulu-bulmaw bäyän itelmäde. Çarada qatnaşuçılarda bu kvorum bulmaw säbäple yäşerelmäde mikän digän soraw uyattı. Mondıy qorıltaylar qararlar, rezolyutsiä qabul itü, idarä, räis, cawaplı särkätib saylaw belän tämamlanırna tieş bulsa da, bu çarada bolarnıñ berse dä eşlänmäde.

Mönir Wafin, Ufa
XS
SM
MD
LG