Accessibility links

Кайнар хәбәр

Tönyaq Kavkazda yaña kierenkelek - caylaw eşenä Kozak üze kereşä


Mäskäwneñ Tönyaq Kavkazdağı säyäsäte yänä awır sınaw kiçerä. Töbäktä yaña nizaq çığara alırlıq wäzğiatne çişü eşenä Rusiä prezidentınıñ könyaq bülgedäge wäkile Dmitri Kozak üze kereşte. Ay başında Çeçnäneñ Dağstan belän çigendäge awar awılında çirattağı "çistartu" ütkärelep, andağı 11 keşe çitkä alıp kitelgän ide. Kozak monı bar Rusiägä qarşı qortqıçlıq dip atıy häm ğäyeplelärne cawapqa tartaçağın belderä.

Çeçnäneñ Dağstan çigendäge Borozdinovskaya awılında yäşäwçe ber meñläp awar, 4 yündä federal'' köçlärneñ şul awılğa kilep mäğlüm "zaçistka" - "çistartu" ütkärüen häm şunnan soñ anda 11 irneñ yuğaluın beldergän ide. "Çistartu" waqıtında federallar ber 77 yäşlek qartnı ütergän, berniçä yortqa ut törtep kitkän. Şunnan soñ inde awıldağı awarlar yaña ezärlekläwlärdän qurqıp, berençel kiräk-yaraqların yök maşinalarına töyägän dä, Çeçnädän Dağstanğa çıqqan häm anda Kizlär rayonında çatırlar qorıp waqıtlı toraq tözegän. Şuşı waqiğä Kavkaz töbägendä yaña nizaq, bu yulı inde çeçennär belän awarlar arasında çığu ixtimalın tudırdı, kierenkelekne caylaw eşenä Rusiä prezidentınıñ könyaq bülgedäge wäkile Dmitri Kozak üze kereşte. Çärşämbedä ul Çeçnä başqalası Groznıyğa kilep, Borozdinovskaya awılındağı xällärgä bağışlanğan maxsus kiñäşmä ütkärde, häm bu uñaydan üzeneñ näfräten belderep, awar awılndağı xällär bar Rusiägä qarşı kürelgän ber qortqıçlıq ğämäle bulıp tora dide. Kozak şulay uq, federal'' xakimiat şuşı başbaştaqlıqnı bolay ğına qaldırmayaçaq dip tä äytte:

Audio, Dmitri Kozak

"Älege oçraq, häm alarğa qädär bulğan xällär, näfrät uyatırlıq närsä, moña bez dä, şul keşelär üzläre dä çıdap utırırğa tieş tügel, alarğa ifrat ta zur ruxi zian kilgän häm älbättä, tieşle räsmi ähellär monıñ öçen üz cäzasın alırğa tieş" di Rusiä prezidentı wäkile Dmitri Kozak. Şul uq könne Borozdinovskaya awılı urnaşqan Çelkovskaya rayonınıñ xakimiat başlığı eşennän alındı, prokuratura maxsus cinayät eşe başlap cibärüen xäbär itte. Rusiäneñ baş prokurorı urınbasarı Nikolay Şepel'' Vladikavkazda Kozak kürsätmälären inde üti başlawın xäbär itte:

Audio, Nikolay Şepel''

"Bu oçraqnı tikşerü öçen sivil dä, xärbi dä prokurorlar kergän maxsus törkem tözelde, alar xäzer şahidlärne soraştıra, 100-dän artıq keşedän inde soraw alındı. Bez xällärneñ niçek bulğanlığın açıqlarbız dip uylıym" di baş prokuror urınbasarı Şepel''. Borozdinovskaya awılınıñ üzendä ay başındağı "çistartu"nıñ Sälim Yamadayev citäkçelegendäge maxsus "Vostok" törkeme tarafınnan başqarıluı xaqında söylilär. Yamadayevnıñ şuşı törkeme inde küptännän federal'' köçlärneñ ber öleşe bulıp tora, anda barı tik çeçennär genä xezmät itä. Borozdinovskaya awılında yäşäwçelärneñ berse:

Audio

"Bezdän haman, sez monı üz küzläregez belän kürdegezme, şahidläregez barmi dip sorıylar. Äye, alar bezdä şaqtıy häm şularnıñ dürte "Vostok"nıñ başlığı Yamadayevqa törtep kürsätä" di Borozdinovskaya awılı keşese. Keşe xoquqların yaqlawçı Memorial törkeme mäğlümatına qarağanda, may ayında ber qorallı törkem Borozdinovskaya awılında ber keşene ütergän bulğan, ä anıñ ulı "Vostok" törkemendä xezmät itä ikän. Şuña kürä Borozdinovskayadağı "çistartu" ul, çeçennärdän torğan şul "Vostok"nıñ awılda yäşäwçe awarlardan üç aluı bulıp tora dip isäpli Memorial xezmätkärläre. Şulay itep, Kavkazda yänä millätara nizaq öçen cirlek tua ala.

Kärim Kamal
XS
SM
MD
LG