Düşämbe könne, 27 iyündä, Tatarstanda küp sanlı qunaqlar sabantuyların, Qol Şärif mäçeteneñ açılışın qarağannan soñ öylärenä ozatu. Uzğan comğa könne Qazan kirmänendä mähabät mäçet açıluı şähärneñ ruxi dönyasın, keşelärneñ energetikasın bayıtıp, quwätländerep cibärde. Anıñ östäwenä din, millät, ruxi miras, cirle xakimiätlär, tarixi şähärlär belän bäyle konferensiälär, xalıqara sammitlar Qazannıñ tormışın qaynattı. Bu çaralar xätta şimbä könne ütkän sabantuylardan soñ da däwam itte. Bu könnärdä Qazanda bulğan räsmi zatlar, ataqlı ğalimnär, säyäsätçelär isäpsez-sansız ide. Çit il ilçeläre, säyäsätçelär, eşquarlar Tatarstannıñ küptänge dusları adım sayın oçrap tordı.
Şähärneñ beryulı cide urınında ütkän sabantuylarınıñ ciñüçeläre, tösmerläre, qızıqlı waqiğaları turında äytep tä tormıybız. Beryulı 350-450 meñ keşeneñ milli bäyrämdä qatnaşuı häm yözlärçä, meñnärçä keşelärneñ cırçı-biyuçe, köräşçe bularaq tanıluı, prezidentnıñ häm başqa abruylı qunaqlarnıñ qaysı sabantuyda buluı, kem atınıñ niçänçe urında kilüe turında süz quyırtıp tormıybız, çönki eşlär tağın da qızuraq kitte. Eş şunda ki, Qol Şärif mäçeten açu häm fänni, mädäni çaralar Qazannıñ meñ yıllığın ütkärüdä repetitsiä bulıp tora. Küper, ippodrom, metro tözü, yullarğa asfal't cäye tağın da qızuraq bara. Şähärneñ iñ qızu eş barğan noqtalarına, mäsälän, küper tözeleşenä zur citäkçelär utırğan vertoletlar tiz genä oçıp kilep, şulay uq tiz genä kitep baru ğädäti xäl.
Düşämbe könne isä yäşlär könenä bağışlanğan qayber çaralar ütä. Yäşlär sport ministrı Marat Bariev respublika xalqın şuşı bäyräm belän qotladı. Piramida küñel açu üzägendä zur türälär, diplomatlar, artistlar tügel, ä fizik mömkinçelekläre çiklängän yäki invalid balalarnıñ çığarılış kiçäse uza. Sişämbedä Qazanda Amerika könnäre başlana. Sişämbe kiçendä AQŞnıñ Mäskäwdäge ilçese Verşbou äfände kilä. Başqa möhim qızıqlı çaralar da bar.
Sälätle yäş jurnalistlarnıñ “Altın qäläm” festivalendä qatnaşuçı 110 yäş qız häm uquçı malay İdel buylap säfärgä quzğaldı.
Rimzil Wäli
