Accessibility links

Кайнар хәбәр

İnternet aşa niçek tatar süzen işetterergä?


Şuşı atnada, «Azatlıqqa», Başqortstannıñ Dürtöyle rayonınnan audio-file räweşendä xat kilep töşte. Ber niçä kön elek, şuşında yäşäwçe Foat Rafiqov isemle keşe, üzeneñ dustı şağir Fänis Räxmätullin belän söyläşep, cırlaşıp utırğan. Häm ul waqıtta başqarılğan cır, audio fail räweşendä internet aşa bezgä kilep citte. Häm xäzer bezneñ efirda yañğırıy. Cırnı Dürtöyledän Foat Rafiqov başqara. Baqsaq, bu cırnı yazdırıp alırğa häm tieşle formatqa küçerergä, annan internettan cibärergä aña Ufadan qaytqan qunaqlar yärdäm itkän. Häm bu fail da Qazanğa Ufadan kilgän. Dürtöyledä üzendä internet barmı, yuqmı bezgä bilgele tügel. Ämma bu xäl internet aşa tawış räweşendäge xatlar almaşu mömkinlegen kürsätä. Bilgele, telefon elemtäse sıman, tawış belän maxsus söyläşü programmaları da bar. Bu xaqta ayırım ber programmanı bağışlap söyläşerebez äle. Xäzergä, ğädäti elektron poçta mömkinlekläre häm tatar entuziastları eşlägän programmalar turında söylämäkçe bulabız.

Elektron poçta tartmasın niçek açırğa, häm anıñ aşa niçek xat alışırğa internetta totaşqan härkem belä beraz. Xat servisları xäzer küp, iñ ataqlıları : www.mail.ru, www.rambler.ru, www.yandex.ru häm başqalar.

Zamanında, tatarça mail xezmäten yasıy başlağan entuziast yegetlär turında söylägän idek. Şamil Biktaş häm Albert Bolğarı isemle internetçılar, www.beznen.net säxifäse nigezendä tatarça xäreflär belän eşli torğan xezmätne eşlärgä alınğan ide. Älegä bu eş tämamlanmağan. Qızıqsınğan keşe www.beznen.net digän saytta ezlänep, küpmeder mäğlümat tabıp, bäxäsxanädä fikerdäşlär taba ala. Ä menä www.tatlog.com digän internet säxifäne yasağan keşelär. Şul uq, Albert Bolğarı, häm Ürmäküç digän isem astında yazuçı bilgesez tatar keşese, şuşı www.tatlog.com xezmäte aşa inde bilgele xat-xezmätlären qullanıp tatarça xat alışırğa täqdim itä. Tatarça xat alışu öçen, inde bulğan mail.rudağı tartmağıznı şuşı tatlog.com aşa açıp uqırğa kiräk. Anda tatar xärefläre belän yazıp bula, barlıq xezmätlär, «kerä torğan xatlar», «çığa torğan xatlar», «kärzin» kebek papkalar da tatar telendä birelä. «Cibärü», «küçerü», dip boyırıqlar birergä mömkin. Sez yazğan xatlarda tatar xärefläre kürensen öçen, xat alası keşe dä älege www.tatlog.com säxäfäse aşa üzeneñ tartmasın kerep uqırğa tieş bula. Bu xezmät mail.ru häm yändex.ru öçen eşli. Ä www.tatlog.com aşa eşläw sezgä oşamıy ikän, yäki internetqa totaşu mömkinlege yuq ikän, Outlook Express kebek, kiñ taralğan xat uqu programmasında tatarça xäreflärne kürep bula.

Bikä Timerova.

XS
SM
MD
LG