Şuşı könnärdä, Rusiä mäğärif ministrınıñ, Tatarstanda pedagogik häm gumanitar universitetnı buldıru turında qararı çıqtı. Ul Milli universitet bulırğa tieş ide. Tatarstannıñ Milli universitetı ul, ğadi uqu yortı ğına tügel. Anı açu - milli xäräkätneñ xıyalı ide. Säyäsätçelär, Milli universitet kiräk, dip yañğırawıqlı aksiälär ütkärde. Ğalimnär, az sanlı millätlärneñ dä üz universitetları bar, dip äytep kilde. Milli mäğärif belän şöğellänüçelär dä, universitetı bulmağaç, tatar telendäge urta belem birüneñ mäğnäse qalmıy, dip äytep kilde. Cämäğätçelek kötte. Tatarstan prezidentı, tözeleş başlanğanda, respublikanıñ üzeneñ universitetı bulır, dip ışandırğan ide. İnde xäzer, binası äzer bulğaç, eçtälege niçek bulır ikän digän söyläşülär qalqıp çıqtı. Belgänegezçä, yaña universitet, gumanitar häm tatar-amerika regional institutlarnıñ Pedagogika universitetına quşılıp, anıñ nigezendä tözeläçäk. Universitet rektorı itep, xäzerge pedagogik universitet citäkçese Cämil Niğmätov bilgelänä. «Şähri Qazan» gäzitendä basılğan mäqälädä äytelgänçä, balalar sanı kimi, elekke külämdäge kebek uqıtuçılar äzerläw kiräk tügel. Finanslaw da azaya bara. Şuña da, gumanitar institut yuridik zat bularaq yuq iteläçäk. Gumanitar institut xezmätkärläre bu yañalıqnı küñelsez xäbär, dip qabul itä häm kileşergä telämi. Gäzit yazğança, gumanitar institutnıñ kiñäytelgän utırışında, uqıtuçılar, mödirlär häm professorlar uqu yortların yaqlap çığış yasağan. Gumanitar institutnıñ rektorı Wasil Ğayfullin bu xälne, yuğarı uqu yortın tar-mar itü, üterü, dip bäyälägän. Tatarstan mäğärif ministrı eş urınnarı saqlanaçaq, disä dä, yaña pedagogik häm gumanitar universitet rektorı Cämil Niğmätov, bu quşılu waqıtında qısqartular buluına da işärä yasağan.
Gumanitar häm pedagogik universitet kebek yuğarı uqu yortları, nigezdä, uqıtuçılar äzerli ide. Öçençe yuğarı uqu yortı, tatar-amerika regional institut da gumanitar belgeçleklärgä basım yasıy. Universitet nindi teldä uqıtaçaq, anda niçä fakel’tet, nindi belgeçleklär bulır, älegä ber kem belmi. Alayda cämğiättä fiker alışular başlandı.Tatar ictimaği üzäge citäkçese Tälğät Bariev süzlärençä, bu üzgärtep qorular, millätçelär xıyallanğan milli universitetqa oxşamağan. Anıñ fikerençä, bu xäl çarasızlıqtan kilep çıqqan. 90nçı yıllarda däwlätneñ milli universitetın buldıru mömkinlege bulğan, ä xäzer yuq. Tälğät Bariev, Amerikadağı tatar ğalime Yulay Şamil uğlı tözegän konsepsiä yaqlı. Ul da, konsepsiä avtorı belän bergä, az ğına studentlar qabul itä torğan elitar yuğarı uqu yortın kürergä telär ide. Bilgele ğalim, tel belgeçe Fuat Ğäniev uylawınça, tatar xalqınıñ milli universitetı bulırğa tieş. Anıñ nindi buluı - ikençe mäs’älä, dide. Anda tatar häm çit tel belgeçläre, uqıtuçılar äzerlänergä tieş, dip sanıy ul. Ul üz çiratında, ğalim bularaq, anda belem birergä äzer. Milli universitet tiräsendä fiker alışular däwam itä.
Bikä Timerova.
