Çärşämbe kiçendä Rusiäneñ berençe televiden'ye kanalınnan “5 veçerov” tapşıruı uram balalarına bağışlanğan ide. Bu tapşıruğa Tatarstanda yäşäwçe Rezidä isemle 15 yäşlek qıznıñ 4 ayaqlap yörüe, etlär arasında yäşäwe kürsätelde. Mäskäw televideniese xezmätkärläre mawğli sıman qıznı Piträç rayonındağı ber tatar awılına maxsus kilep kamerağa töşerep alğannar.
Şulay itep, böten Rusiä tamaşaçısı şaqqatırğıç xälne üz küzläre belän kürde. Ni öçen bu qız etlär, xaywannar arasında yäşäwgä künekkän? Niçek Rezidäneñ yort xaywannarı cılılığına sıyınıp kön kürüenä änise yul quya? “5 veçerov” tapşıruı mondıy tamaşalarnı bik yarata.Uzğan atnada toq- şouda balağa uzğan 11 yäşlek ber qıznı kürsätep, anıñ tormışın tikşergän idelär.
Döres, bu çärşämbedä Piträç rayonında yäşäwçe Rezidä häm anıñ eçkeçelekkä birelgän änise studiädä kürenmäde. Rezidäneñ canwarlarça yäşi başlawı öçen änise cawaplı. Rayon prokurorı Minäğdäs Şärapov eçkeçe xatınnıñ üz qızın qaraw xoquqınnan mäxrüm itü turında eş quzğatqan. Sişämbe könne Piträç rayonı mäxkämäse mawğli qıznıñ änise Menzida Tumbakovanı ana xoquqınnan mäxrüm itü turında qarar çığardı.
Mäxkämä qararı 22 iyüldä üz köçenä kerergä tieş. Ämma qayber jurnalistlar öçen bu faciğä tamaşa bulıp kürenä. Qazandağı ber populyar televidenie kanalı qırğı qıznı et öere başlığı itep kürsätü belän bik mawıqtı. Bu xälne qızıq itep qarawçılar kübäyep kitte. Sarı matbuğatta häm televidenie Rezidä tarixın çamadan tış quyırtıp kürsättelär. Rayon xakimiäte Rezidäne jurnalistlar belän oçraştırmasqa tırışa. Xäzer inde ul çäçen - başın tarap, yaña djinsı kostyum kiep yori. Anıñ tormışı ğädäti tärtipkä kerä başlarğa da mömkin. Barı tik änise genä xämer eçüdän ayırıla almıy. 15 yäşlek qıznı normal' tormışqa qaytaru öçen çaralar kürelä.
Çärşämbe kiçendäge tapşıruda Rezidäneñ etlär arasında yörüe, alarğa oxşatıp qılanuı kürsätelsä dä, anıñ änise studiädä kürenmäde. Dimäk toq- şou oyıştıruçılarnıñ bu turıdağı plannarı barıp çıqmağan.
Andrey Malaxov Rezidäne häm anıñ änisen kiterüne taläp itkän. Yuq isä ul Tatarstannıñ tiskäre küreneşen böten dönyağa kürsätü belän yanağan. Rezidäne Mäskäwdän kilgän operatorlar töşerep alğaç ta, anıñ änise berençe kanal studiäsenä kiterelergä tieş bulğan.
Rezidälärneñ kürşese İlham İdrisov Rezidäneñ maxmırdan intekkän änisen maşinağa utırtıp, stansiägä alıp barğan häm aldan alınğan bilet buyınça Mäskäwgä alıp kitkän. Ämma Mäskäwgä citkändä, bu xatınnı ozatıp baruçı İdrisovqa yaqtaşları şaltıratıp, anıñ tuğan awılıbıznı mäsxärädä qatnaşmawın taläp itkännär. Näticädä Mäskäwgä baruçı piträçlelär poyızdan töşep Qazanğa kire qaytıp kitkännär Tapşıruda barı tik Qazan psixonevroloya xezmätkäre genä ekspert bularaq qatnaşqan. Yäğni eşlär, Malaxov telägänçä kilep çıqmağan.
Xäzer Rezeda maxsus korreksiä mäktäbeneñ lagerında yal itä. Mäxkämä anı normal' şartlarda tärbiäläw öçen änisennän ayıru kiräk dip tapqan. Ul bit et tügel, ä qız bala sotsial' xezmätkärlär anıñ tormışın üzgärtergä ömetlänälär dip yazdı Vostoçnıy Ekspress gäzite.
Azatlıq radiosı öçen Gölnaz Şäyxetdinova. Qazan
