Accessibility links

Кайнар хәбәр

Tony Blair möselmannarnı terrorğa qarşı bergä köräşergä çaqırdı


Uzğan atnada Londonda bulğan terror höcümnäreneñ ber oçı Paqstan belän Mısırğa kilep totaştı, inde mäğlüm bulğança anda berniçä keşe qulğa alındı.

Britaniä premyer-ministrı Tony Blair, möselmannarnı İslamnı ekstremistlardan çistartırğa yärdäm soradı. Üz çığışın Blair Londonda säyäsi institutta yasadı.

"Bez yawız ideologiä belän eş itäbez. Bu – tsivilizasiälär suğışı tügel, här ädäple keşe – möselmanmı ul, tügelme – monı kürgäç näfrät kiçerä. Ämma bu global köräş, İslam eçendä häm tışında fiker, küñel häm añ köräşe. Bu köräşne ciñergä tieşbez," dide Tony Blair.

Comğa könne Blair, ekstremizmnı ayıru bik qıyın, möselman şiğäre belän köç qullanu – İslamnı mäsxäräli, dip beldergän ide. Britan xökümäte başlığı ekstremizmnı üz ilendä genä tügel, böten dönyada ayırır öçen tırışlıqlar artaçaq, dide.

"Kiläse atnada bez başqa partiälär citäkçeläre belän Möselman yulbaşçıları belän oçraşabız. Şunda bez köräşne bergä däwam itergä kileşerbez, dip uylıym. Ämma min başqa illär belän dä İslamnıñ çın yözen tanıtu öçen xezmättäşlek itergä telim," dide Blair.

Premyer-ministr fikerençä, Ğiraq häm Äfğanstan kebek möselman illärendä demokratiä tözüneñ berdän ber yulı – başta İslam ekstremizmın yuq itü.

Ul arada uzğan atnadağı terror ğämälläre artında nindi köçlär torğanın tikşerü däwam itä. İnde xäbär itkänebezçä, 4 intixarçınıñ isemnäre bilgele. Alarnıñ 3se Britaniädä tuğan paqstanlı yäşlär bulğan, Leeds şähärendä yäşägän. Şulay uq Leeds şähärendä bioximiä uqıtqan mısırlı Mäğdi Än-Naşar, höcümnärgä qatnaşı buluda şiklänelep comğa könne qulğa alındı. Mısır eçke eşlär ministrlığı, Än-Naşar Al Qaidağa qatnaşı buluda şiklänelmi, dip belderde. Ul üze nindi dä bulsa qatnaşı bulğanın kire qaqtı. Anıñ ber tuğanı Möhämmäd Mähmüd Än-Naşar, Qahirädä, jurnalistlarğa, Mäğdi ğäyeple bula almıy, dide.

"Tuğanım Londonnan bik şatlanıp qayttı, fatir, xatın ezli ide. Barı tik uquları turında uyladı. Ul ğädäti keşe"

Tikşerüçelär süzlärenä qarağanda, Mäğdi Än-Naşarnıñ Leedstağı öyendä berniçä kilo qurqınıç ximik mäddä tabılğan. London polisiäse başlığı İan Blair, tikşerüçelär, 18dän alıp 30 yäşkä qädärge intixarçılarnıñ Al Qaidağa qatnaşı bulu bulmawın açıqlarğa tırışa, dip belderde.

Polisiä citäkçese, comğa könne BBC radiosı belän bulğan äñgämädä, tikşerüneñ maqsatı – höcümnärne oyıştıruçılarnı tabu, dip belderde. Älegä Paqstan belän elemtälär tikşerelä, intixarçılarnıñ kimendä 2seneñ Paqstanda bulıp qaytqanı mäğlüm.

Alsu Qormaş
XS
SM
MD
LG