Accessibility links

Кайнар хәбәр

Başqortstan Berläşkän oppozitsiäse wäkilläre kiñäşmä ütkärde


Ufada Başqortstan Berläşkän oppozitsiäse Qoordinatsiä şurasınıñ çirattağı utırışı bulıp ütte. Anı oppozitsiä köçläre başlığı Ramil Bignov açtı häm alıp bardı. Kiñäşmädä Başqortstan tatar milli oyışmalarınıñ da küp kenä wäkilläre qatnaştı häm söyläşügä çığarılğan töp tema da Başqortstan tatarları xoquqları öçen köräş mäsäläsenä bağışlanğan ide. Bu atnada Başqortstanğa Mari El respublikasınnan mari xalqı milli xäräkäte wäkilläre eş säfärenä kilgän. Ramil Bignov äytüençä, alar üzläre belän bik möhim dokumentlarnıñ küçermälären dä alıp kilgännär. Mäğlüm buluınça, mari xalqı milli xäräkäte üz milläte xoquqların yaqlap, Awropa parlamentına möräcägät itkän ide. Awropa mäxkämäsenä tapşırılğan dokumentlar ölgesen mari milli xäräkäte citäkçeläre bu atnada Ufağa kilgäç, Başqortstan tatar milli oyışmaları liderlarına da tapşırğan. –Şul dokumentlarnı centekle öyränep çıqqaç, bez şular nigezendä üzebezneñ xoquqlarnı yaqlap, şulay uq Awropa parlamentına häm başqa xalıqara oyışmalarğa möräcägät itäçäkbez, dide Ramil Bignov. Koordinatsiä şurası utırışında oppozitsiä wäkilläreneñ berse, Başqortstan xalıq kongressı dip atalğan terkälmägän oyışmanıñ räise Ayrat Dilmöxämmätovqa qarşı cinayät eşe açıluı turında da söyläşü buldı. Ayrat Dilmöxämmätovqa qarşı mäxkämä eşe başlansa, oppozitsiä wäkilläre anı yaqlaw öçen törle çaralar küräçäge, şul isäptän, mäxkämä binası aldında piketlar oyıştıraçağı turında da äytte.
XS
SM
MD
LG