Başqortstan Hawa yulları şirkäten qulğa töşerü öçen köräş däwam itä. Soñğı un yıl eçendä törle tetränülär kiçergän bu şirkät tiräsendä tağın da ığı-zığı başlandı. Mäğlüm buluınça, elek berböten şirkät bulğan «Başqortstan Hawa yulları» berläşmäse 2002 yılda ikegä bülenep, «Başqortstan Hawa yulları» şirkäte häm «Ufa» xalıqara aeroportı» şirkäte tözelgän ide. Şul çaqta «BAL» aviaşirkäte federal qaramaqqa küçerelde. Ä «Ufa» xalıqara aeroportı» şirkäte Başqortstan qulında qaldı. Älege bülenü ber dä faydağa bulmadı, waqıt-waqıt şuşı ike şirkät arasında ber-bersenä qarşı däğwalar belderelä, ber-bersen mäxkämägä birülär qabatlanıp tora. Menä soñğı tartqalaşu şuşı yılnıñ yaz aylarında tağın yañarıp kitkän ide. «BAL» şirkäteneñ 3 mln. sum tiräse burıçı cıyılıp kitte, dip «Ufa» xalıqara aeroportı» anı mäxkämägä birde häm «BAL» aviaşirkäten bankrot dip tanunı taläp itte. 24 yündä Başqortstan Arbitraj mäxkämäse utırışı bu taläpne qänägätländerde häm çınlap ta «BAL» şirkäten «bankrot» dip tanu turında qarar çığardı. Şul mäxkämä utırışında bik qızıq ber açış yasaldı. Baqsañ, Başqortstan citäkçelege dä federal qaramaqta bulğan «BAL» aviaşirkäten bankrot itügä qızıqsınu kürsätä ikän. Monıñ säbäbe şunda uq açıqlandı. Şuşı yılnıñ 20 augustında «BAL» şirkäten aksionerlaştıru ütärgä tieş ide. Ägär dä «BAL» şirkäte bankrot dip tanılsa, Başqortstan xökümäte anıñ iñ zur küpçelek aksiälären aluğa däğwa itä ala ide. Läkin bu xäl belän «Başqortstan Hawa yulları» şirkäte kollektivı riza bulmadı häm biredäge hönär berlekläre şirkätneñ xoquqların yaqlap, törle çaralar kürä başladı, federal üzäkkä möräcägätlär belän çıqtı. Ä bu çärşämbedä, hönär berlekläre citäkçeläre çaqıruı buyınça, Mäskäwdän Rusiäneñ Hawa transportı federal agentlığı citäkçese Aleksandr Yürçik kilep, oçraşular ütkärde häm biredäge wäzğiät belän yaqınnan tanıştı. Şuşı oçraşularnıñ näticäse turında «Azatlıq» radiosına «Başqortstan Hawa yulları» şirkäte hönär berlekläre räise urınbasarı Sergey Yıştokin xäbär itte.Anıñ süzlärençä, şuşı könnärdä biredäge wäzğiätne nıqlap tikşerü öçen, Mäskäwdän tağın ber törkem yuğarı däräcäle citäkçelär kilä. Ğomumän, mäsäläneñ uñay çişeleşenä ömet totalar monda. Sergey Yıştokin «BAL» şirkäten aksionerlaştırunıñ xäzer şaqtıy soñraq waqıtqa kiçereläçägen äytä. «Bu çarada, hiçşiksez, Başqortstan xökümäte dä qatnaşu xoquqına iä häm ul üzenä tieşle aksiälärne alırğa xaqlı, – di Yıştokin äfände. – Ämma bu eş «BAL» şirkäten bölgenlekkä töşerep tügel, ä ğädel ütärgä tieş».
Şulay itep Federal üzäk belän Başqortstan xaqimiätläre arasında tege yäki bu ere şirkätne üz qaramağına alu öçen köräş däwam itä. Xäzer inde bäysez belgeçlär äytüençä, büleşer närsä dä qalmağan. Şulay da milek büleşü öçen yaña säbäplär tuıp qına tora.
