Accessibility links

Кайнар хәбәр

Discoverydağı astronavtlar berençe märtäbä açıq ğälämgä çıqtı


Xalıqara Ğäläm Stansiäsenä kilep quşılğan Quşma ştatlarnıñ Discovery ğäläm korabındağı astronavtlar bügen berençe märtäbä açıq ğälämgä çıqtı. AQŞnıñ ğäläm agentlığı NASA bu turıda bolay dip belderde. AUDİO: Bu Stansiäneñ eşen däwam itüen tä''min itü öçen ğälämgä 59-nçı çığış. Üzäk waqıt belän 4 säğät 46 minutta Steve Robinson belän Soiçi Noguçi berençe märtäbä ğälämgä çıqtı. Üzäk Aziä östennän 360-lap çaqrım bieklektä Yapon astronawtı açıq ğälämgä çığu belän AUDİO: "Qapqaç açıq. Bu nindi Mansara" dip belderde. Anna soñ Oçışlar idaräsennän Amerikan astronawtı Steve Robinsonğa ğälämgä çığarğa quşıldı. AUDİO: OK, Steve. Siña xäzer korabnıñ işegen yabarğa kiräk bula. Härnärsäneñ tieşençä buluın rasla da işekne yap. İke astronawt açıq ğälämdä 6 yarım säğät eşläp 2 yıl elek bulğan Columbia korabı hälakätennän soñ öyränelgän tözätü ısulların tikşerä. Alar açıq ğälämdä maxsus yabıştırğış cilem belän izolyatsion kisäklärne häm qanat materialların yabıştırıp qarıy. Bu korabnı Cirgä qaytqanda atmosferağa kergäç bulaçaq köçle qaynarlıqtan saqlarğa tieş. 2003-nçe yılda AQŞnıñ Columbia ğäläm korabı cirgä qaytqanda cılılıq izolyatsiäläwçe öleşkä zararlanğan buluı näticäsendä törle kisäklärgä tarqaldı. Korabtağı 7 astronawtnıñ barısı da hälak buldı. İzolyatsiä öleşe ul çaqta cirdän quzğalıp kitkändä yağulıq bagı tiräsennän ber öleşneñ qubuı bulğan ide. NASAnıñ monı buldırmaw tırışlıqlarına qaramastan bu yulı da Discovery cirdän oçıp kitkändä yağulıq öleşennän tağın ber kisäk quptı. NASA Discoveryğa zur zarar kilmägän häm ul cirgä qayta ala dip isäpläwen belderde. Discoverynıñ qaytuı 7-nçe avgustqa bilgelängän ide. Ämma Xalıqara Ğäläm Stansiäse Discoverydağılardan yardäm sowağaç, östäm eş çığu säbäple Discovery säfären ber köngä ozayttı. Programma citäkçeseneñ urınbasarı Wayne Hale Xalıqara Ğäläm Stansiäse bezdän tağın ber köngä Stansiä belän bergä qalıp alar belän bergä östämä eşlär başqarunı soradı, alar başqarası eşlär isemlegen äzerli başladı dide. Discovery qaytır yulğa quzğalğançı Noguçi belän Robinson äle tağın 2 märtäbä Düşämbe häm Çärşämbe könnärne açıq ğälämgä çığaçaq.

Naif Aqmal, Praga.
XS
SM
MD
LG