Pekin -- Qıtay başqalasında barğan Tönyaq Koreanıñ atom qoral programın tuqtatuğa bağışlanğan 6-yaqlı söyläşülärneñ 9nçe könendä dä küzgä kürenerlek täräqqiät bulmadı. İrtänge utırışta Qıtay wäkilläre tarafınnan täqdim itelgän urtaq belderüneñ yaña, inde öçençe ölgese tikşerelde. Yabıq işeklär artında ütkän utırış turında älegä ber xäbär dä yuq. Quşma Ştatlar törkeme citäkçese Christopher Hill söyläşülär axırğa taba bara, dide. Qıtay räsmie isä, taraflar ike yaqlı söyläşülärne däwam itergä kileşte, dide. Amerikan wäkilläre Qıtay, Yaponiä häm Rusiä wäkilläre belän ike-yaqlı oçraşular ütkärde. Näticälär turında xäbär itelmi. Bu oçraşular aldınnan Hill, 6 tarafnıñ 5se töp prinsiplar mäsäläsendä kileşergä äzer, ä menä Tönyaq Korea, monıñ belän kileşerme, älegä bilgesez, digän ide. Tönyaq Korea wäkile Kim Kye Gwan, räsmi Pxenyan äle dä Washington belän bulğan qarşılıqlarnı kimetergä ömetlänä, digän belderü yasadı.
