Accessibility links

Кайнар хәбәр

Amerikannar Ğiraqta bu könnärdä zur yuğaltular kiçerä


Bu könnär Ğiraqtağı amerikan köçläre öçen iñ dähşätle çor buluğa oxşap tora. Çärşämbedä maşinaları minağa elägü säbäple ilneñ könbatışında 14 marin häm alarnıñ tärcemäçese hälak buldı, ber kön elek şul uq töbäktä barğan bäreleşlärdä Quşma Ştatlarnıñ 6 ğäskärie üterelgän ide. Soñğı 10 kön eçendä genä amerikannar Ğiraqta 44 xärbien yuğalttı.

Marinnar amerikan ğäskäreneñ iñ äzerlekle öleşe sanala häm näq menä şul säbäple alar arasında yuğaltularnıñ soñğı könnärdä küzgä kürenep artuı Quşma Ştatlarnıñ Ğiraqtağı eşläre bik ük şäptän barmıy digän şiklär uyata. Marinnar üterelgän Xädifä şähäre ilneñ könbatışında, Süriä çigennän kilgän olı yulda yata. Şuşı şähär, amerikannarğa qarşı köräşkän ğisyançılarnıñ Ğiraqqa aqça häm qoral kiterü çeltärenä kerä dip sanala. Çärşämbedä anda 14 amerikan xärbie hälak buldı, ber kön elek Xädifägä yaqında ğına 6 marin üterelgän ide. Londondağı ber tikşerenü institutında Yaqın Könçığış programmasında eşlägän Jonathan Lindley fikerençä, bu yuğaltular ğisyançılarnıñ oçraqlı räweştäge uñışı ğına bulıp tora, alar başqa berni dä añlatmıy dip belderä Lindley:

Audio, Jonathan Lindley

"Andıy höcümnärneñ qaywaqıt uñışlı buluı tabiği närsä häm säyäsi yaqtan qarağanda bu älbättä ğärländererlek küreneş, ämma ul Quşma Ştatlarnıñ Ğiraq säyäsätenä zur tä''sir yasamas kebek" di Jonathan Lindley. İkençe ber belgeç, Jeremy Binnie dä monıñ belän kileşä häm marinnar barğan yulğa mina quyu ällä ni zur ostalıq taläp itmi, şuña kürä amerikannarğa qarşı köräşneñ yaña çorğa kerüe xaqında söyläw urınsız dip sanıy:

Audio, Jeremy Binnie

"Ğisyançılar küzlegennän qarağanda, amerikan yağın zur yuğaltularğa duçar itep alar bu yulı beraz uñışlıraq qına buldı. Alar şul minanı üzläre yasap, çağıştırmaça zäğif maşinağa qarşı ğına qullanğan" di Binnie. Anıñ qarawı, düşämbedäge yuğaltularnı Jeremy Binnie küpkä citdiräk bäyäli. Ul çaqta marinnarnıñ altı märgäne ğisyançılar tarafınnan qamap alınıp, atışlarda üterelgän ide. Şuşı höcümne soñraq "Sönni Ğäskäre" digän ber törkem üz östenä aldı. Märgännär marinnar arasında da ostaraqlardan sanala, alarnıñ andıy wäzğiatkä elägüe üze ber säyer närsä, di Jeremy Binnie:

Audio, Jeremy Binnie

Binnie süzlärenä qarağanda, ägär dä marinnarnıñ alarnı qamap alğan ğisyançılarğa tieşle cawap qaytarmawı açıqlansa, bu ğäcäyep bulır ide. Bäreleştä qarşı yaqnıñ nindi yuğaltular kiçerüe xaqında isä mäğlümat älegä yuq. Başqa belgeçlär amerikan marinnarı arasındağı märgännärneñ şaqtıy zäğif yaqlanuına iğtibar itä, alar töp törkem belän daimi elemtädä torsa da, yış qına üzläre genä qalıp eş itä, şuña kürä dä alar açıq bäreleşlärdä zur qarşılıq kürsätä almıy dip belderä. Östäwenä, Pentagon üze dä bu yulı Xädifädä qurqınıç häm tirä-yün şartlarına qarap suğış alımnarın üzgärtep torğan doşmanğa yulığuın tanıy. 2003-nçe yılnıñ martında Ğiraqqa basıp kergännän birle Quşma Ştatlarnıñ qorallı köçläre anda kimendä 1821 xärbien yuğalttı dip xäbär itä Associated Press agentlığı.

Kärim Kamal
XS
SM
MD
LG