Accessibility links

Başqortstan wäkillege Çiläbe ölkäsendä buldı


Prezident Mortaza Räximov citäkçelegendäge Başqortstan wäkillege comğa könne Çiläbe ölkäsendä eş säfärendä buldı. Älege wäkillekkä räsmi dairälärdän tış, Başqortstannıñ baytaq qına ere şirkätläre häm oyışmaları citäkçeläre, tanılğan eşquarlar da kerde. İrtän irtük Çiläbegä kilep töşü belän Mortaza Räximov ölkä ğubernatorı Petr Sumin belän söyläşülär alıp bardı häm ike yaqlı xezmättäşlekne üsterü mäsälälären tikşerde.

Mäğlüm buluınça, 1998 yılda Çiläbe ölkäsendä Başqortstan Respublikınıñ Daimi wäkilçelege açılğan ide. Ä 2003 yılda, ike töbäk arasındağı xezmättäşlekneñ xoquqıy nigezen nığıtu maqsatında, Başqortstan Xökümäte belän Çiläbe ölkäse Xökümäte arasında säwdä-iqtisadi, fänni-texnik, sotsiäl-mädäni xezmättäşlek turında yaña Kileşügä qul quyıldı. Bügen Çiläbedä ütkän oçraşuda isä şuşı kileşüneñ qayber yünäleşlären täğayınläştergän berketmäne imzaladılar.

Başqortstan Tışqı iqtisadi elemtälär häm säwdä ministrlığınıñ matbuğat üzäge citäkçese Möxämmät Bağişayıv äytüençä, Başqortstan wäkillege, räsmi söyläşülärdän soñ, Çiläbe şähärendäge qayber ere şirkätlärdä, sotsiäl yünäleştäge yaña binalarda, törle oyışmalarda oçraşularda da buldı. Çiläbe traqtorlar citeşterü şirkätendäge yaña proyıqtlar belän tanışu ike tarafqa da kiläçäktä xezmättäşlekneñ yaña yaqların açaçağın rasladı.

Bu könnärdä Çiläbe ölkäsendäge tatarlar belän başqortlar tuplanıp yäşägän Qonşaq rayonı oyıştırıluğa 70 yıl tuldı. Şuşı yübileynı bäyräm itü qısalarında, Başqortstannan kiñ bilgele «Kärwansaray» estrada-fol'klor törkeme häm başqa sänğät kollektivları kilde. Alar bäyräm çaralarında çığış yasayaçaq.
XS
SM
MD
LG