Kommunistlar üzlärenä qarşı höcümgä zarlana

Comğa könne irtän irtük Rusiä Kommunistlar partiäseneñ Başqortstan bülege wäkilläre utırğan binağa sud pristawları kilep kerüe xaqında xäbärlär taraldı. Ufanıñ üzägendä, Frunze uramındağı binağa kilep kergän pristawlar Başqortstan kommunistlarına başqalınıñ Kirov rayonı mäxkämäseneñ qararın tapşırğan. Ul qarar 18 august könne qabul itelgän häm anda Başqortstan kommunistlarınıñ 20 nçe august könne Ufada ütkärergä tieşle respublik konferensiäseneñ qanunsız buluı turında äytelgän. Ägär bu konferensiä ütkärelsä dä, anıñ qararlarınıñ qanunsız bulaçağı turında iskärtelä. Ni öçen şundıy xäl kilep tuuın açıqlaw öçen bez Rusiä Kommunistlar partiäseneñ Başqortstan bülege citäkçese Rinat Ğäliev belän oçraşıp söyläştek. Anıñ süzlärençä, Başqortstan Yüstitsiä idaräse, şimbä könne ütäçäk konferensiägä deleğät itep saylanğan Sklyarowa xanımnıñ şiqayatenä nigezlänep, partiägä qarşı Kirov rayonı mäxkämäsendä eş açqan. Rayon mäxkämäse isä, östän kürsätmä bulğaç, «konferensiäne ütkärtmäskä» dip könendä ük qararın çığarıp ta quyğan. Sklyarowa xanım nindi şiqäyät yazğan soñ? Baqsañ ul, «mine konferensiägä çaqıruçı bulmadı», digän säbäpne kiterep, Yüstitsiä idaräsenä şiqäyät yazğan ikän. Rinat Ğäliev süzlärençä, Sklyarowa xanım konferensiä bulaçağı xaqında aldan uq xäbärdar, şulay bulğaç, bu barmaqtan suırıp çığarılğan uydırma säbäp kenä. Menä Rinat äfändeneñ üzen tıñlıyq.

(Rinat Ğäliev)

Sez Rusiä kommunistlar partiäseneñ Başqortstan bülege citäkçese Rinat Ğäliev fikerlären işettegez. Anıñ süzlärençä, kommunistlar şimbä könne konferensiä ütkärä almasa da, aşığıç plenumnı barıber ütkäräçäk häm könüzäk mäsäläläre tikşeräçäk. Ä kiläse atna başında uq KPRF wäkilläre, Ufanıñ Kirov rayonı mäxkämäse qararınıñ döres tügellegen isbat itü öçen, Başqortstan Yuğarı mäxkämäsenä möräcägät tapşırırğa cıyına.