Accessibility links

Ayatolla Ali äs-Sistani kiçäge faciğadan soñ xalıqnı berdämlek häm tınıçlıqqa çaqırdı


Kiçä Ğiraq başqalasında taptalıp ülgän meñgä yaqın keşene bügen kümü yolasında meñlägän keşe qatnaştı. Şiğilär üzläreneñ oluğ ruxaniläre Musa al-Kadhim qäberenä xac qılğan waqıtta çıqqan eteş-törteş näticäsendä häläk buldı. Cärähätlär alğan keşelär yatqan Kadhimiya xastaxanäsenä bügen premyer-ministr İbrahim al-cağfari, saqlanu häm sälämätlek saqlaw ministrları kilde. Qorbannarnıñ kübese – balalar häm xatın-qızlar bulğan.

Eteş-törteş çıqqan küperdän yıraq tügel yäşägän Möhammäd al-Qaissi, wazğiätne menä niçek añlattı:

"Häläk bulğannarnıñ ğailäläre qoyaş bayığançı häm mäyetlär mäçetkä kiterelgänçe öylärennän çıqmadı. Bulğannarnı añlatırlıq süz dä tabıp bulmıy. Bu – böten möselmannar öçen zur faciğa," dide Qaissi.

Ğiraqta 3 könlek mätäm iğlan itelgän.

Şiğilärneñ yuğarı ruxanie Ayatolla Ali äs-Sistani xalıqnı berdämlek häm tınıçlıqqa öndäde. Qayebr räsmiläre eteş-törteşkä kitergän intixarçı turındağı xäbär taratuda sönnilärne ğäyepläde. Ämma küperdä suğışçılar buluı turındağı xäbär raslanmadı.
XS
SM
MD
LG