Accessibility links

Tatnet : tatar gäzitlärenä internet aşa yazılu


Bu atnanıñ iñ zur waqiğası, zamança texnologiälärgä bağışlanğan konferensiäneñ ütüe, anda täqdim itelgän yaña proetklar buldı. Bu xaqta köndälek tapşırularıbızda söylägän idek inde. Konferensiädä mäğlümäti texnologiälärne, ayırım alğanda internet çeltären cäyelderü, internet räweşendäge respublika küläme çeltär buldıru kebek mäs’älälär qaraldı. Tatarstandağı mäktäplärgä, internet barısına da diärlek kertelde inde, dielde älege fänni-praktik cıyında. Xäzer şuşı mäktäplär, respublika däräcäsendäge mäğärif, belem birü çelteränä totaşıp kilä. Ütkän tapşıruda, «Mäğärif portalı» açıluı turında söylägän idek. Portal, yäğni başqa saytlarnı berläşterüçe säxifä, kiläçäktä, Tatarstan uqıtuçılarınıñ virtual dönyasına äwerelergä tieş, ämma älegä bu proyekt tözelep kilü xällätendä genä. Uqıtuçılar dönya päräwezenä mäktäptäge kompyuterlar aşa çığa alsa, zamança texnologiälärğä qatnaşlığı bulmağan keşelär global çeltärgä çığa almıy, dip uylawçılar bar. Ämma, internetqa totaşu urınnarı, sez uylağança yıraqta tügel. Respublika buylap urnaşqan poçta büleklärendä dä internetqa totaşu urınnarı oyıştırılğan. Andıy urınnarnı sez üzegez yäşägän töbäktä, poçta bülegendä taba alasız. Qazan ütkän konferensiä qısalarında, zamança texnologiä, alar birgän mömkinleklär belän tanıştıruçı kürgäzmä eşläde. Anda «Tatarstan poçtası» stendı yanına kilep, bu oyışmanıñ belgeçläre belän söyläşep, poçta birä torğan mömkinlekär turında beldek.

«Tatarstan poçtası» oyışmasınıñ finans xezmätlär bülege başlığı Natalya Kalaşnikova añlatqança, kiläçäktä, poçta büleklärendäge internetqa totaşu urınnarınıñ sanı, bigräktä awıllarda, kübäyäçäk. «Tatarstan poçtası» böten rusiä külämendä bara torğan «Kiberpoçta» proyektında qatnaşa. Anıñ nigezendä, awıl rayonnarındağı poçta büleklärendä, internetqa totaşqan kompyuterlar urnaştıru, alarda här kemgä eşlärgä mömkinlek birü qaralğan. Tatarstanda bu proyekt tormışqa aşırıla başlağan inde. Xäzer Tatarstan buylap andıy 194 eş urını bar. Alardan, här ayı sayın 20 meñläp keşe global çeltärgä totaşa, dip xäbär itte Tatarstan poçtası bülege başlığı Natalya Kalaşnikova. Qazanda andıy internetqa totaşu urınnarı azraq, kompyuterlar barı 5-6 poçta bülegenä genä quyılğan. Ä qalğan başqa eş urınnarı rayonnarda urnaşqan. Kollektiv totaşu urınnarına ixtiac, Natalya Kalaşnikov süzlärençä, şähärgä qarağanda, awıllarda zurraq. «Tatarstan poçtası» oyışmasınıñ internet säxifäse turında söylägän idek inde. Anıñ adresı www.tatpochta.ru. Şuşı säxifä bu könnärdä yaña büleklär belän tulılandı. Anda mäsälän virtual yazılu bülege eşli başladı. Adresı podpiska.tatpochta.ru. Şuşı säxifä aşa xäzer, internet yärdämendä gäzit-jurnallarğa yazılırğa mömkin. Bu yaña xezmät turında tulıraq itep, bu eş belän şöğellängän bülek başlığı Radik äfände Timerşin söyläde. Anıñ süzlärençä, sayt aşa yazılırğa bula, tüläwne poçta xezmätkärenä tere aqça belän birergä mömkin, MasterCard häm Viza kredit kartaları belän, bankka aşa açqa küçerep başqarırğa bula.

Tatar gäzit-jurnallarğa internet aşa yazılu Tatarstanda tügel, ä kübräk respublikadan çittä faydalı bula alır ide. Ägär gäzitlärne taratu, äbünäçelärgä iltep tapşıru oyıştırılğan bulsa, äñgämädän işetkänegezçä, Rusiä poçtası berdäm taratu tarifların berdäm itkännän soñ, tatar matbuğatın taratu ciñeläyä.

htpp//podpiska.tatpochta.ru säxifäsendä, Tatarstan häm Rusiä katalogına kergän teläsä nindi gäzit-jurnallnı saylap alıp bula. Şul isäptän tatar telendägesen dä. Bu xezmätne sez www.tatpochta.ru internet säxifäse aşa çığa alasız.

Bikä Timerova.

XS
SM
MD
LG