Accessibility links

Кайнар хәбәр

Sember ölkäse Novospasski rayonı üzägendä mähabät mäçet açıldı


Tantanada räsmi xaqimiät wäkilläreneñ dä qatnaşuı çarağa cıyılğan 3000 çaması keşe tarafınnan kötelmägän büläktäy qabul itelde. Xäzer mäçetlär açu ällä ni yañalıq tügel inde – bulğannarın tieşle däräcädä qullanu möhimräk. Şulay da bu mäçetne açu tantanasınıñ üzençälekläre ayırım söyläşü taläp itä.

Berençedän, ike qatlı zur bina ğibädät yortı ğına tügel, mädäni üzäk, mädräsä bulıp ta xezmät itäçäk. İkençedän, tantanağa ölkäneñ baytaq rayonnarınnan ğına tügel, kürşe Samara, Penza ölkälärennän, Mäskäwdän häm Tatarstannan da qunaqlar kilgännär ide. Häm iñ möhime – tantanada rayon häm ölkä başlıqları Aleksandr Vrajnovnıñ häm Sergey Morozovnıñ da qatnaşuı.

Sergey İvanoviç, kilüe belän ük, üzen uratıp alğan xalıq aldında menä ni dide: “Tatarstannıñ çäçäk atıp yäşäwenä barıbız da ğäcäplänäbez. Qayberäwlär monı anda aqça küplege belän añlatmaqçı. Eş bötenläy anda tügel. Alar üzlären ruxi häm aqıl yağınnan paq''lıylar häm tärbiälilär. Menä bez dä bu yaqtan ciñ sızğanıp eş başlayaçaqbız.”

Tantananı Ul''yan ölkäseneñ Üzäk diniä nazäräte möftie Fatıx xäzrät Aliullov açıp cibärde. Anıñ härwaqıttağıça tirän eçtälekle wäğäze bu yulı yäş buınnı tärbiäläwgä bağışlanğan ide. Häm yaña bina ğibädät yortı ğına tügel – mädäni üzäk häm tärbiä uçağı bulıp ta xezmät itärgä tieş.

Novospasski rayonı başlığı Aleksandr Vrajnov üzeneñ çığışında beryulı Spas-Preobrajenie çirkäwe häm möselman mäçeteneñ tözelüenä iğtibar yünältte häm ikeseneñ dä xalıq tözeleşe buluın assızıqladı. Ul şulay uq, İlbaşı Putinnan ürnäk alıpmı inde, täbrik süzen tatarça tämamladı.

Gubernator Sergey Morozov üzeneñ çığışında yänä Tatarstannan alıp qaytqan tä''sirläre belän dä urtaqlaştı. Kürşelärebezneñ uñışlarına ğäcäpländem diü – berni dä äytmägändäy bula. Bez şundıy kürşelärebez buluğa ğorurlana häm şatlana alabız. Andağı törle millätlärneñ dustanä üzara möğämäläläre bezgä ürnäk bulırğa tieş. Qızğanıç, bezneñ ölkädä bu yaqtan bez telägän närsälärneñ barısı da eşlänä dip äytep bulmıy. Bu cähättän, ruxanilar belän kiñäşläşep, ölkä üzägendä zur çirkäw häm mäçet tözügä aqça bülep birü turında Qanunnar çığaru cıyılışına täqdim belän çığaçaqmın.

Mäçet tözeleşeneñ canı bulıp torğan Kärim Adelev bu izge eşkä zur öleş kertkän şäxeslärgä räxmät süzlärennän soñ, gubernatorğa mäçetneñ tirä-yağın asfal''tlau ğözere belän möräcäğät itte. Sergey İvanoviçnıñ “Menä bezneñ tatarlarnıñ şul ğädäte bigräk tä oşıy inde miña”, digän süzläre xalıqnı canlandırıp ta aldı. Häm gubernator irtägä ük yul tözeleşe xezmäte wäkilen biregä yünältäçägen belderde.

Mäskäw qunağı Arslan xäzrät häm Tatarstan wäkile Linur xäzrät Rawil Gaynetdin häm Ğosman İsxaqi xäzrätlärneñ täbrik süzlären xalıqqa citkerdelär. Linur Sabircanovnıñ dinebezdä ixlaslıq kiräklege turındağı wäğäze ayıruça tä''sirle buldı. Ämma Çınlı rayonı başlığı Xänäfi Ramazanovnıñ iñ möhim köndälek mäsälälärgä bağışlanğan çığışın cıyılğan 3000 meñ çaması keşe ayıruça cılı qabul itte. Ul Sergey Morozovnı “pravil''nıy gubernator” dip atadı häm aña möselmannarnı qıyırsıtunı tuqtatunı, Şamanov waqıtında ike törkemgä bülengän möselmannarnı berläşterü qorıltayı uzdırunı sorap möräcäğät itte. Häm misal itep üz rayonında törle dinnär ruxanilarınıñ bertuğanday dustanä yäşäwlären kiterde.

Tasma kisü xoquqı rayon, ölkä başlıqlarına häm Fatıx xäzrätkä birelde. Sergey Morozov mäçetneñ eçke küreneşe belän dä tanışqaç, anıñ arxitekturasın yuğarı bäyäläde häm balalar öçen mädräsä oyıştıru niäten xupladı.

“Azatlıq” radiosı, Ayrat İbrahim, Sember.

XS
SM
MD
LG