Başqortlarnıñ üz irekläre belän Rusiägä quşıluın bäyräm itü töp iğtibar üzägenä mende. Bu uñaydan kön kürgän mäqälälärdä, xäbärlärdä urıs däwlätenä quşılu geosäyäsi yaqtan mantıyqqa turı kilüe äytelä.Mäsälän, “Yäşlek” gäziteneñ 17 sintäbr sanında çıqqan mäqäläne alıyq. Aña qarağanda, imeş, Ural böten Yevraziäneñ üzäge. Kem Uralğa iä – şul dönyağa iä. Bu geosäyäsi töbäkne Hitler da, yapon militäristları da basıp alırğa teläde. NATOnıñ Rusiäne tarqatu planı da Uralğa bäyle. Mondıy ähämiätle töbäkne başqortlar üzläre genä saqlap qala almas ide. Şuña Rusiägä quşılu mantıyqqa turı kilä.Şulay dip “Yäşlek” gäzite yazıp çıqtı.
Cämägätçelek autobusı totuçı eşquarlar häm däwlät yul xäräkäte iminlege xezmätläre arasında qarşılıq başlandı. Eş şunda, Rusiädä “Autobus” isemle operatsiä başlanğan ide. Operatsiä barışında militsiä autobuslar texnik tözeksez dip yulğa çığarmıy. Qayber könnärdä Ufada 300gä yaqın autobus passajir taşudan çitläşterelä. Näticädä cämägätçelek transportına çiratlar xasıyl buldı. Ä bu autobuslar, yuğisä, şul uq yul xäräkäte iminlegendä qaralıp, texnik tözek dip tabılğan bulğan. Autobus xucaları militsiägä qarşı mäxkämälärgä ğarizälar yawdıra. Bügenge köndä mäxkämägä 15 ğarizä birelgän.
