Tatarstan respublikası telläre turındağı qanun häm älege qanunnı tormışqa aşıru buyınça däwlät programması nigezendä tapşırıla torğan grantlar ğämälgä inde berniçä yıl elek kertelde. Alar yılğa ike märtäbä tapşırıla. Bu eşkä aqçalar respublika byudjetınnan birelä. Grantlarğa, yäğni aqçalata tüläwlärgä, tellär, alarnı saqlaw, üsterü turındağı yazmalar öçen Tatarstanda eşläp kilüçe mäğlümät çaraları däğwä itä ala. Yazmalar ike däwlät telendä dä täqdim itelergä mömkin. Üzläreneñ tapşıruların yäki yazmaların layıqlı dip sanağan mäğlümät çaraları, ä alar arasında gäcit-jurnallar ğına tügel, ä elektron mäğlümät çaraları da bulırğa mömkin, respublikanıñ Tatmedia massaküläm kommunikatsiälär agentlığına möräcäğät itärgä tieş. Grant alu öçen tutırılğan ğarizağa tellär temasına tapşırular ürnäkläre yäki näşer itelgän mäqälä, yazmalar da östälä. Şulay uq, yaña proyektlar, tellär ölkäsendä tormışqa aşırırğa telägän ideyalar da qarala ala. Mäsälän, küptän tügel genä Yaña ğasır kanalında efirğa çığa başlağan Kitap kiştäse rubrikası näq menä Tatmedia tapşırğan grant aqçası xisabına eşli başladı.
Kilgän ğarizalarnı bäyge komissiäse qarıy. Anı Tatmedia agentlığınıñ general direktorı Marat Moratov citäkli. 21 sentäberdä 2005 yılnıñ ikençe yartıyıllığınıñ grantların tapşıru buyınça komissiä utırışı ütte. Anda ğalim Döriä Ramazanova, Tatarstannıñ Ministrlar Kabinetı wäkile Ğalimcan Ğilmanov, jurnalist Rimzil Wäliev häm başqalar qatnaştı. Qızğanıçqa qarşı, Tatmedia agentlığında 21 sentäberdä tapşırılğan grantlar turında bezgä mäğlümät birmädelär. Älege mäs’älä belän şöğellänä torğan xezmätkär bik citdi häm aşığıç eşläre bulu säbäple, kemgä häm närsä öçen aqçalata yärdäm tapşırılu turında mäğlümät birüdän baş tarttı. Azatlıq radiosı belä alğan mäğlümätlärgä qarağanda, bu yulı grantlar aluçılar arasında Sabıyğa häm Mäğärif jurnalları, şulay uq Tatarstan teleradiokompaniäse dä bar.
Älbättä, tapşırıla torğan aqçalar ällä ni zur tügel. Mäsälän, 2005 yılnıñ berençe yartıyıllığında tapşırılğan bar grantlarnıñ küläme 550 meñ sumnı täşkil itte. Şularnıñ 100 meñe basma, 450 meñe – elektron mäğlümät çaralarına tapşırıldı. Bu yulı aqçalata yärdäm aluçılar arasında Tatarstan yäşläre, Tatar ile gäcitläre, Täteş rayonınıñ Avangard rayon gäcite, Yaña ğasır, Tatarstan teleradiokompaniäläreneñ berniçä tapşıruı, Älmät häm Tübän Kama teleradiokompaniäläre dä grantlarğa layıq buldı. Birelä torğan aqçalata yärdäm alay zur bulmasa da, finanslarğa tamaqları tuymağan mäğlümät çaraları öçen alar da yarap quya. Mäsälän, İntertat.ru elektron gäcite şuşı grant xisabına berniçä yaña kompyuter alıp cibärde. Läkin, qızğanıçqa qarşı, tel, anıñ yazmışı xaqında bik möhim, sallı, töple fikerle yazmalar urnaştıra torğan küp kenä gäcit, jurnallar, bigräk tä tatar tellelär, grantlarnı alu öçen bäygedä bötenläy qatnaşmıylar. Ä bit östämä aqçalar alarğa da yarap quyar ide.
Gölnaz İlgizär
