Tatarstannan çit töbäklärdä tatar kitapxanäläre yuq däräcädä disäk tä yalğış bulmas. Omskida 25 meñnän artıq tatar yäşäsä dä, şähärdä tatar kitapları tuplanğan ber genä kitapxanä dä yuq. Döres, ölkäneñ tatar awılları mäktäplärendä, kitapxanälärendä tatar ädäbiäte yuq tügel. Omskinıñ üzendä dä qayber kitapxanälärdä tatar basmaların tabarğa mömkin. Puşkin isemen yörtkän Omski ölkä üzäk kitapxanäseneñ, xalıqara üzäk bülegendä Tatarstannan kilgän ğazetlär, jurnallar, berniqädär tatar kitapları saqlana. Ämma xäzerge zamanda alar küp oçraqta törle kürgäzmälär oyıştıru ğämälendä qullanılalar. Tatar basmaları bügenge köndä tulılandırılmıy da. Çönki zamanalar üzgärü, qimmätçelek säbäple, kitapxanälär waqıtlı matbuğatnı aldıra almıylar häm yaña kitaplar buldırırğa da mömkinlekläre yuq. Şulay da kitapxanä xezmätkärläre süzlärençä, qayber yaña basmalar kürengäli, arasında ayırım keşelärneñ yäisä oyışmalarnıñ büläkläre dä bula. Omskinıñ üzäk kitapxanäsenä şundıy ber büläk - Qazannıñ 1000 yıllığına bağışlap çığarılğan şiğerlär cıyıntığı Sankt-Peterburgtan kilep töşte. Bu büläkne yaqtaşlarına istälek itep çığışı belän Omski ölkäsennän bulğan, xäzer Sankt-Peterburgta “Çişmä” tatar-başqort oyışmasın citäkläwçe, basmanıñ baş möxärrire Saytbağin Änwär Rizvan ulı cibärde. Älege kitapnı Änwär äfände Qazannıñ 1000 yıllığı bäyräme waqıtında Omski ölkä tatar milli- mädäni moxtariäte äğzalärenä birep, kitapxanägä tapşıruların sorağan ide. Moxtariät aktivı bu atnada kitapxanä citäkçeläre belän oçraşıp büläkne tapşırdı. Kitapxanädä anı räxmät äytep qabul ittelär, direktor urınbasarı Marina Zaxarenko kitap kiştälärendä ul layıqlı urın alaçaq dide.
Bu kitapnı ul, şuşı könnärdä kitapxanäneñ yaña binağa küçüenä 10 yıl tulu uñayınnan oyıştırılğan kürgäzmägä quyılaçağı turında da belderde
Bu Omski üzäk kitapxanäse direktorı urınbasarı Marina Zaxarenko buldı. Ber uñaydan şunı da äytep ütärgä kiräk, moxtariät äğzaläre kitapxanägä “Tatar dönyası” gazetası tuplanmasın da tapşırdılar häm kiläçäktä yaña sannarı belän tulılandırıp torırğa wäğdä ittelär.
