Rita ğarasatınıñ köçe tağın da arttı

Quşma Ştatlarnıñ Meksika qultığı yarlarına yaqınlaşuçı Rita ğarasatınıñ köçe tağın da artıp 5-nçe iñ yuğarı däräcäğä citte. Tizlege säğätenä 280 çaqrımğa citkän cildän qaçıp Teksas häm Luiziana ştatlarındağı 1 million 300 meñläp keşe evakuatsiälänä. Berniçä atna elek New Orleansqa zur zıyan kitergän Katrina ğarasatınnan soñ aqrın eş itüdä tänqitlängän AQŞ xakimiätläre Galveston, Corpus Christi häm öleşçä Houston şähärlärendä evakuatsiä iğlan itte. Evakuatsiä härmanı xalıq äle genä kire qayta başlağan New Orleans şähäre öçen dä birelde. AQŞ prezidentı George Bush bu färmannarğa citdi qararğa kiräk dide.

New Orleans häm Galveston öçen mäcbüri evakuatsiä färmanı buldı. Min watandaşlarnı däwlät häm cirle xakimiätlär quşqannı iğtibar belän tıñlarğa häm ütärgä çaqıram dide Bush. Moñarçı Quşma Ştatlarda 5-nçe iñ köçle däräcädäge 3 kenä ğarasat buldı. Rita ğarasatı şimbä irtäsendä Houstonnan 120 çaqrımlap könyaq-könbatışta yar buyına kilep citär dip kötelä. Yar buyında diñgezdän 2 yarım metr bieklektä urnaşqan 58 meñ keşelek Galveston şähäre bügen inde tulısınça diärlek buşatıldı. Xalıq maşinalar belän citkä ağıla. 1900-nçe yılda ğarasat Galvestonda 6 meñläp keşene üterep şähärne tulısınça diärlek yuq itkän ide. Katrina ğarasatınnan qaçıp kitüçelärneñ iñ zur öleşen sıyındırğa Houston merı Bill White Xökümät maşinaları citärlek tügel dip evakuatsiä eşlärendä xalıqnı ber bersenä yardäm itärgä çaqırdı. Corpus Christidan başqaça kitä almawçılar öçen ber yözläp aftobus äzerlänä.