İzrail premyer-ministrı Ariel Şaron Gazadan atılğan raketalarğa cawap çaraları kürergä färman birgän. Bügen İzrailneñ töbäktäge Hamas suğışçılarına hawa höcümnärendä 20gä yaqın fälestinle cärähätlär alğan. Kiçä 2 fälestinle häläk bulğan dip xäbär itelä.
Fälestin premyer-ministrı Ahmed Qurei, Gazada jurnalistlarğa, ägär dä İzrail köç qullanunı tuqtatmasa, wazğiät kontroldän çığarğa mömkin, dide:
"İzrail Gazada köç qullanunı tuqtatırğa tieş. Alar – üzläre iğlan itkänçä, Gazadan çığıp kitergä tieş. Alar anda qalırğa tieş tügel. Fälestinnärne üterü öçen yañadan anda tanklar cıyıldı. Xalıqara cämäğätçelek cawaplılıqnı üz östenä alırğa tieş, yuqsa wazğiät kontroldän çığaçaq dip qurqam," dide Qurei.
Bügen Könbatış Yarda İzrail xärbiläre Hamas häm İslam Cihadı suğışçıları buluda şiklänelgän 200gä yaqın fälestinlene qulğa aldı.
