Accessibility links

Кайнар хәбәр

Rusiädä möselman vitse-prezident bulırmı?


28 sentäber könne matbuğat oçraşuında Rawil Ğäynetdin jurnalistlar sorawlarına cawap birde. Anıñ älege oçraşuda äytkän fikerläre Rusiä möselmannarı arasında ğına tügel, başqa din wäkillärendä, cämäğätçelektä dä qızıqsınu uyattı. Ayıruça zur iğtibarnı Ğäynetdinneñ kiläçäktä Rusiädä vitse-prezident wazifasın kertep, aña möselman keşesen bilgelärgä kiräklege turındağı täqdime cälep itte. Mäsälän, Mäskäw patriarxatınıñ tışqı elemtälär bülege citäkçese Vsevolod Çaplin, ber dingä genä andıy östenlek birü döres tügel, Rusiäneñ xoquq sistemasında etnik yäki dini törkemnärneñ wäkillege qaralmağan, dip belderde. Ä Rusiä yähüdläre Federatsiäse wäkile Borux Gorin, bezdä din däwlättän ayırılğan, digän fiker işetterde. Tatarstan Diniä näzaräte räise urınbasarı Wäliulla Yaqub ta Borux Gorinnıñ fikere belän kileşä. Mondıy fantastik ideyälärne tormışqa aşırıp mataşqançı, Rawil Ğäynetdin äytkän başqa ber täqdim – Rusiädä berdäm Diniä näzaräten buldıru belän şöğellänergä kiräk, dip sanıy ul.

Rusiä möselmannarın berläşterergä kiräklege belän ğalim, din belgeçe Rafiq Möxämmätşin dä kileşä. Läkin, Wäliulla Yaquptan ayırmalı bularaq, ildä möselman vitse-prezidentı buluına da ul qarşı tügel.

Bügenge köndä Rusiädä 40tan artıq möftiät bar. Alarnı berläşterergä waqıt citkän, dip sanıym. Döres, tiz genä ilneñ böten möselmannarın berläşterü real’ eş dip uylamıym, läkin bu yünäleştä eş başlarğa kiräk. Ğäynetdinneñ bu fikeren min xuplıym. Ä Rusiädä vitse-prezident wazifasın kertep, ul möselman bulırğa tieş digän ideyä ul şaqtıy qızıq ideyä. Çönki möselmannar Rusiädä pravoslav dinen totuçılarda qala ikençe urında. Citmäsä, bügenge köndä Rusiäneñ tışqı säyäsäte dä möselman illärenä taba yünälgän. Bez bit äle İslam konferensiäse oyışmasına küzätüçe räweşendä kerergä dä uylıybız. Älege täqdim Rusiä xakimiätläre tarafınnan tikşerelergä tieş, dip sanıym

Bu din belgeçe, ğalim Rafiq Möxämmätşinnıñ fikerläre ide.

Şulay itep, Rusiädä genä tügel, xätta Tatarstanda da möftineñ täqdimnäre şaqtıy qarşılıqlı mönäsäbät tudırdı.

Gölnaz İlgizär

XS
SM
MD
LG