Sişämbe kiçendä barlıq möselmannar Ramazan ayına kerdelär. İnde bik küptännän dönya möselmannarı yıl sayın uraza totıp kilsä dä, anıñ böten yola, ğöref – ğädätläre här möselmanğa bilgele bulsa da, Tatarstan imamnarı cıyılıp ayırım ber plenumnı urazağa bağışlıy. Ramazan ayında islam ğalimnäre genä yıl sayın qarar çığara torğan mäs'älälär bar. Äytik, urazağa qayçan kerü. Ramazan ayı ber yılnı 29, ä ikençe yılnı 30 könnän kilä. Bolarnı astronomiä belgeçläre belän berlektä qazıy yäki möftilär genä bilgeli ala. Bıyıl Çistay şähärendä uzğan utırış qararı nigezendä Uraza 5 oktäberdä başlana. Ä 4 oktäber könne yästü namazınnan soñ berençe täräwix namazı uqıla. Tatarstan möselmannarı Diniä näzaräteneñ särqatibe Marat xäzrät Galimov älege mäs'älä buyınça plenum qararı belän tanıştırdı.
“Bezneñ Tatarstan cirendä qazıy tarafınnan, şulay uq plenum utırışta täräwix namazınıñ başlanuı awız açqannan soñ säğät yarımnan bilgelängän. Säxärne qoyaş çıqqançı ike säğät qala aşap beterergä kiräk. Yäğni irtänge namazğa yartı säğät qala säxär aşarğa häm annarı irtänge namaz uqibız, annan säğät yarımnan soñ qoyaş çığa. Bıyıl uraza bezneñ 29 könnän kilä”. Bıyıl Uraza 29 könnän kilgäç, dimäk 3 noyäberdä Ramazan bäyräme, yäğni Uraza ğayıte bulaçaq. Ul könne uraza totılmıy. küplär irtänge namazğa mäçetlärgä aşığaçaq. Şulay uq bu könne irtänge namazdan soñ wäğäz, annarı ğayıt namazı uqıla. Ä añarçı Ramazan ayında maxsus taratıla torğan fitr sädäqäsen birep ölgerergä kiräk. Fitr sädäqäsennän qala, şulay uq fid'ya häm zäkät sädäqäläre bulırğa mömkin. Alarnıñ külämen şulay uq, din ğalimnäre bilgeli. Äytik, här can isäbennän birelä torğan fid'ya sädäqäsı igen xaqınnan çığıp bilgelänä. Älege mäs’älägä dä Marat xäzrät Galimov açıqlıq kertte.
“Zäkät küläme bıyıl 35 meñ sum bula. Yäğni keşeneñ malı 35 meñnän artsa, ul şul xisaptan qırıqtan ber öleşen yätimnärgä, meskennärgä tülärgä tieş. Ul yaqınça 900 sum bula. Fitr sädäqäse plenum utırışında qazıy tarafınnan 15 sum itep bilgelände. Fidiä sädäqäse 50 sum bulırğa tieş”.Möselmannar öçen Ramazan ayı çistarınu, saflanu, Allahqa yaqınayu ayı. Anı şulay uq yılına ber genä kilä torğan räxmät ayı da dip äytälär. Uraza başlanu uñayınnan Tatarstan möselmannarınıñ Diniä näzaräte häm möfti xäzrätlär isemennän Marat xäzrät Galimov Ramazan ayı belän qotladı.
“Mökatdäs Ramazan ayı belän böten möselmannarnı täbrik itäm. Härberebezgä urazalarnı isän – saw totıp çığarğa nasıyp bulsın. Härberebezgä bäxet – säğädät, sälämätlek. Rabbıbız bala xäsrätlärennän saqlasın bezne. Allahı bezgä ozın ğömer häm köç qödrät birsen”.Gölnaz Şäyxetdinova
