Accessibility links

Кайнар хәбәр

Nijgar cıyınında berdäm möfti saylanmayaçaq


Küptän tügel genä Rusiä möftilär Şurası räise Rawil Ğäynetdin Mäskäwdä jurnalistlar belän oçraşıp, dini häm ictimaği tormışqa tä’sir itärlek berniçä täqdim kertkän ide. Şularnıñ berse – Rusiädä berdäm möftine saylaw. Monı küplär xupladı. Ä Tübän Novgorod Diniä näzaräte wäkilläre isä noyäber başlarında älege şähärdä uzaçaq Bötenrusiä möselmannarı cıyılışında berdäm möfti inde saylanaçaq ta, dip tä äytkän ikän. Bu xaqta İnterfax agentlığı belderde. Älege mäs’älädä añlatmalar alu niäte belän bez Tatarstan Diniä näzarätenä möräcäğät ittek. Läkin anda bu xaqta bernärsä dä belmäwläre turında äyttelär. Şunnan soñ bez Tübän Novgorodqa şaltıratıp, andağı Diniä näzaräte wäkillärennän, çınlap ta şuşı cıyılışta Rusiäneñ berdäm möftie saylanaçaqmı, dip soraştıq. Näzarätneñ üzäk apparat citäkçese Damir xäzrät Möxetdinov Azatlıq radiosına menä nindi cawap birde:

İnterfax agentlığına bez möselmannarnıñ qorıltayı bula, anda Rusiäneñ berdäm möftie saylanaçaq, dip beldermädek. Tübän Novgorodta oyıştırıla torğan Bötenrusiä möselmannarı forumına bağışlanğan matbuğat oçraşuında bez barı tik anda bu xaqta söyläşü, fikerläşü bulır, dip kenä äyttek. Älege mäs’älä xaqında çınlap ta söyläşergä, uylaşırğa kiräk. Läkin berdäm möftine saylarlıq qorıltay bulmıy bezdä. Monıñ öçen delegatlar saylarğa, cıyılışnı başqaça oyıştırırğa kiräk.

Şulay itep, noyäber başında uzaçaq Bötenrusiä möselmannarı forumında berdäm möftine saylaw bulmayaçaq. Xäyer, bu cıyılış, aña äzerlek turında Azatlıq radiosı tıñlawçılarına bez kiläse tapşırularıbızda tulıraq mäğlümät äle birerbez.

Gölnaz İlgizär
XS
SM
MD
LG