Accessibility links

Germaniäneñ yaña kanslerı Angela Merkel bulaçaq


Germaniäneñ yaña kanslerı berençe tapqır - xatın-qız, konservativ köçlär yulbaşçısı Angela Merkel bulaçaq. Bügen ul üzeneñ Xristian Demokratik berlege häm kansler Gerhard Şröderneñ Sosial Demokratik partiäse arasında xakimiätne büleşep zur koalisiä tözü turında kileşü bulğanın rasladı: "Kanslerlıqta xristian demokratlar bulaçaq. Xökümättä köçlär sotsial demokratlar belän bertigez bulaçaq. Berse dä ikençeseneñ tawışın basa almayaçaq." dide Merkel.

Şulay itep 18 sintäber könne uzğan parlament saylawlarınnan soñ däwam itkän xökümät tözü turındağı söyläşülärgä noqta quyılır, dip kötelä. Jurnalistlar aldında Merkel, koalisiä tözü turında söyläşülär 17nçe üktäberdä başlanıp noyaberneñ 12senä qädär tämamlanırğa tieş, dip belderde. Xakimiät büleşü turındağı kileşü äle räsmi iğlan itelmäsä dä, Yevropa Berlege häm çit däwlätlär Merkelne yaña wazifası belän qotlıy başladı. Kileşü şulay uq parlamentnıñ tübän palatasında xuplanırğa tieş.
XS
SM
MD
LG