Tatarstanda “Мы” xäräkäte yartı yıl elek barlıqqa kilde. Häm säyäsät belän qızıqsınuçı yäşlär arasında ul, “Мыши”, yäğni tıçqannar digän isem belän tanıldı. Älege yäşlär xäräkäteneñ barlıqqa kilüe bik qızıqlı. Rusiä prezidentı administratsiäse başlığı Vladislav Surkov, Tatarstanğa räsmi säfär belän kilgäç, Tatarstan prezidentı belän oçraştı. Surkov qaytıp kitte, ozaq ta ütmi, Tatarstanda “Bez” xäräkäte barlıqqa kilde. Küzätüçelär, anı, Rusiädäge “Наши”, yäşlär telendä naşsitlar dip atalğan xäräkäteneñ Tatarstandağı ber tarmağı dip bäyälädelär. Alar, Rusiädä äflisun revolyutsiäsen buldırmasqa dip berläşkännär.
Qazanğa xäräkäteneñ Çallı, Tübän Qama, Çistay häm Yäşel Üzän şähärläre filiallarınnan wäkilläre kilep, syezdda cämğıse 800 keşe qatnaştı. Utırışınıñ töp qunaqları – Tatarstannıñ Däwlät Şurası räise Färit Möxämmätşin häm Yäşlär eşläre, sport häm turizm ministrı Marat Bariev ide.
Syezdnı“Bez” xäräkäten citäkçeläreneñ ber wäkile Viktoriä Çerkesova häm xäräkätneñ liderı Artur Şihapov alıp bardı. Berençe süz itep Artur Şihapov “Bez” xäräkäteneñ maqsatları häm burıçları belän tanıştırıp ütte. Annan soñ Viktoriä Çerkesova “Bez”neñ citäkçe wäkillären arttıru öçen östämä wäkillärne atadı häm alarnı ber tawıştan saylap ta quydılar. Här yasağan çığıştan soñ därräw qul çabular başınnan axırğa qadär tınmadı diärlek. Cıyılışta berdänber tatarça söylägän xäräkät wäkile Emil' Göbäydullin buldı. Bez aña berniçä soraw belän möräcäğät ittek.
- “Bez” dä bez cıyıldıq 2005 yılnıñ başında. Min anıñ ber liderı bulam inde. Xäzer min regionnar belän eşlim. - Bu xäräkätne buldıru ideyäsen kem täqdim itte?
- Şuşı yılnıñ mart ayında bez vuzara seminarğa cıyılğan idek. Şunda berniçä uqu yortları studentları yaña xäräkät kiräklegen äyttelär häm ozaqlamıy eşli dä başladıq. - Mäskäwdä “Bez” digän, sezgä qapma-qarşı xäräkät eşläp kilä. Ni öçen sez ikegez dä ber isemdä?
- Bezneñ xäräkätebez alarğa qarağanda irtäräk dönyağa çıqtı. Belüebezçä qarşı xäräkättä 5 keşe genä… Äytergä kiräk, bezneñ tağın ber ayırmalı yağıbız, “Bez” süzennän soñ küp noqta bara. Bu dimäk Tatarstandağı “bez”çelär xäräkäte ber urında taptanmıy digän süz. Säyäsi yaqtan qarap äytü awır inde ul. Bez kemneder yaqlıybız dip tögäl genä äytep bulmıy. “Bez” ul yäşlär isemennän eşläwçe xäräkät. Älbättä, Tatarstan prezidentı Mintimer Şäymievnıñ da, Putinnıñ da “Bez” eşlägän eşlären kürä häm yuğarı bäyäli. Şuña kürä, alarğa yaqın toru qomaçaw itmäs ide,“Bez”neñçä…Färit Möxämmätşin üzeneñ çığışında yäşlärneñ mondıy uñğanlığınnan bik qänäğät buluın belderde häm Tatarstan respublikası Prezidentı Mintimer Şäymievnıñ da xäräkätkä qarata qotlaw süzläre häm teläkläre yazılğan xatın uqıdı.
- Sezgä bäxet, yaqtı yul telim qäderle duslar!!!“Bez” xäräkäteneñ berençe syezdında başqa yäşlär oyışmalarınıñ wäkilläre dä qatnaştılar. Alar “bez”çelärgä teläklären äyttelär häm xezmättäşlekkä çaqırdılar. Cıyılışnıñ yomğaqlap “Bez” xäräkäten räsmi räweştä terkäw turında süz quzğatıldı. Quzğatılıp qına qalmıyça TR nıñ Däwlät Şurası räise Färit Möxämmätşin häm Yäşlär eşläre, sport häm turizm ministrı Marat Bariev älege täqdimneñ şähitläre bularaq ayırım käğäzgä qul da quydılar. Soñınnan “Bez” çelär ber tawıştan deklaratsiälären qabul ittelär häm basıp üzläreneñ gimnnarına quşılıp cırlıy-cırlıy taralıştılar.
Röstäm İsxaqi
