Accessibility links

Rusiä räsmiläre Nalçik höcümnäre bastırıldı dip belderde


Atnakiç könne qorallı törkem höcümenä duçar bulğan Nalçik şähärennän älegä bäysez mäğlümät alu qıyın. Comğa könne Rusiä räsmiläre şähärne üz kontrolenä aluları turında xäbär itte. Ämmä höcümçelärneñ kem ikäne, küpme buluı, niçä keşeneñ häläk bulğanı turında sorawlar qala birä.

Rusiä räsmiläre äytüençä, atnakiçtä Qabarda-Balqar başqalası Nalçikta bulğan bäreleşlärdän soñ, şähärneñ beryulı 8 urınına höcüm itkän suğışçılar berniçä urında, şul isäptän militsiä bülege häm büläklär kibetendä totıqlar alıp qala alğan. Comğa könne iminlek köçläre maxsus operatsiä ütkärep 7 totıqnı azat itkän, totıqlarğa zıyan kilmägän, ä menä alarnı totqan 11 suğışçı üterelgän dielä.

Rusiäneñ Eçke eşlär ministrı Räşit Nurğaliev operatsiäneñ tämamlanuı turında prezident Putinğa xäbär itte. Anıñ süzlärençä, bu operatsiä öçen xoquq saqlaw oyışmaları 2220 keşedän torğan berläşterelgän törkem tözegän. Opreatsiä näticäsendä 72 suğışçı yuq itelgän, 31e qulğa alınğan. Terrorçılarnıñ Nalçikka höcüme näticäsendä 36 keşe häläk bulğan, şularnıñ 24e – militsiä xezmätkäre, 12se – sivil keşelär. Monnan tış 100dän artıq keşe xastaxanägä kiterelgän dielä.

Nalçikka höcüm itkän suğışçılar sanına kilgändä, Rusiä räsmiläre 60tan alıp 300gä qädär törle sannar kiterde. Şul säbäple niçä suğışçnıñ qaçıp qotılğanı bilgesez. Mäskäwdäge Saqlanu mäğlümäte üzäge citäkçese İvan Safrançuk:

"Höcümdä 300läp suğışçı qatnaştı digän xäbärlär buldı. 80 çaması yuq itelsä, ber-ike distäse totqarlansa, qalğan öçtän-ikese qaçıp kitkän bulıp çığa. Minemçä bu naçar näticä."

Şaqtıy suğışçınıñ qaçıp kitä alu ixtimalına Räşit Nurgaliev äytkän süzlär dä işarä itä:

"Yaralanğan suğışçılarnı ezläw, xastaxanälär tikşerüne, şulay uq şähärdä qalğan suğışçılarnı, qoral saqlanmaların ezläw eşen äwzemläşterergä taläp itäm."

Nurğaliev şulay uq, üterelgän suğışılarnıñ kem bulğannarın açıqlarğa kürsätmä birde. Nalçik höcümnären kem oyıştırğanı älegä builgesez bulıp qala. Comğa könne ğisyançılarnıñ Kavkazcenter internet säxifäsendä bu höcümne Kavkaz frontınıñ Qabarda-Balkqar bülege başqardı, aña Qaraçay-Çerkes bülege öleşeläre dä yärdäm itte digän mäglümät urnaştırıldı.

Nalçik höcüme uzğan yılnıñ Yünendä İnguçetiä başqalası Nazrandä bulğan höcümnärne xäterlätte. Ul höcümnär öçen cawaplılıqnı Şamil Basaev üz lstenä alağan ide. Ul çaqta 80 militsiä xezmätkäre häläk buldı, suğışçılarnıñ kübese, militsiä büleklärennän zur sanda qoral urlap qaçıp qotılğan ide.

Räsmi belderülärgä qarağanda, iminlek köçläre Nalçikta, Nazran belän çağıştırğanda uñışlıraq xäräkät itkän.

Läkin suğışçılarnıñ Tönyaq Kavkaznıñ äle ber äle ikençe şähärendä şundıy höcümnär başqara aluı, alarnıñ äle dä mömkinlekläre buluın kürsätä.

-Ali Gilmi
XS
SM
MD
LG