Accessibility links

Кайнар хәбәр

Törkiädä qoş kizüe säbäple borçular arta


Xalığı 70 millionnan aşqan Törkiäneñ bu atnada töp qayğısın bälki dä Törkiädä “qoş grippı” dip atalğan yoğışlı xastalıqnıñ taralu qurqınıçı täşkil itä. Bu qoşlarnı ğına tügel, adäm balasın da üterä, qurqınıçlı, qoş ite aşawdan saqlanığız diğän Avropa Berlege Sälämätlek Kommissiäseneñ xisabı säbäple Törkiädä panika çıqmadı. Ämma barlıq televidenie, gazetalarda töp tema şuşı qoş kizüwe ide. Karantin häm qanatlılarnı yuq itü protsesı bara digän xäbärlär taralğaç, Millät Mäclese restoranında tawıq, kürkä kebek aşamlıqlar menüdän çığarılğan. Bu xäbärne jurnalistlar eläkterep alğaç, premier-ministrğa häm başqa ministrlarğa sorawlar birä başladılar. Awıl xucalığı ministrı Mehdi Eker “bez här törle çaranı aldıq, tawıq iten yaxşı ğına peşersägez qurqınıç yuq” digän belderü yasadı. Xalıq moña da bik ışanmağaç, bu yulı Parlament räise Bülent Arınç iftar aşı birde, Premier Tayyip Erdoğanda şuşı iftarda jurnalistlar aldında demonstrativ räweştä östälgä kiterelgän tawıq iten aşadı. Ä ber televiziä programasında şayan jurnalist kitergän tawıq botın isä, “min qaya kiselgän, niçek peşerelgän buluwın belmägän tawıq iten aşamıym” digän. Törek xalqı arasında da usal niätlelär bar ikän, andıylar ütkändä dä ber ministr “Çernobil qazasınnan soñ da çäylärebezdä radiasiä yuq” dip televiziä aldında çäy eçkän ide dip ğäybät taratalar. Ämma şunı da äytergä kiräk, Törek xalqı üz säyäsätçelärenä bik nıq ışansa da, tawıq kebek qoş ite satışları qılt dip kiselgän. İxtimal başqa ber säbäp bar.

Äxtäm İbrahim, İstanbul
XS
SM
MD
LG