Accessibility links

Кайнар хәбәр

Mäskäw ölkäsendä möselmannarnı qıyınlar!


Uzğan comğada Mäskäw ölkäseneñ Sergeev Pasad şähärendä, ğibädät yortında möselmannarğa höcüm yasalğan. Sigez urıs şovinistı, “bez möselmannarnı biredä yäşätmäyäçäkbez , dinegezne totarğa irek birmäyäçäkbez”, dip qıçqırıp, ikende namazına kilgän berniçä ir-at, ber xanımnı häm ğibädät yortı imamı Arslan Sadrievnı timer tayaqlar belän qıynap taşlağannar. Bu xaqta comğa könne kiç belän televidenie kanalları da söyläde. Bu waqiğağa bağışlanıp Mäskäwneñ RİA novosti agentlığında matbuğat konferensiäse dä uzdı.

Matbuğat konferensiäsenä qädär Sergeev Pasadnıñ ğibädät yortı imamı Arslan Sadriev belän dä söyläşü mömkinlege buldı. Ul, xälem öydän çığarlıq bulmasa da, matbuğat oçraşuı öçen genä kildem dide. Anıñ timer tayaqlar belän suğudan baş mie selkengän häm küze yanında qatın cäräxät alınğan. Xastaxanädä ul cäräxätne tekkännär. Ğibädät yortında ikende namazına kilgän berdänber xatın qıznı da tipkäläp qıynap, küzlegen watqannar. Bu xällärgä yul quyıp, çarasın kürmäsäk, andıy xällär möselmannar yäşägän başqa töbäklärdä dä bulırğa mömkin dide Arslan xäzrät. Nindi çaralar küräsez, bu xällärgä nindi añlatma biräsez dip, min, Rusiäneñ möftilär şurası räise, Rusiäneñ dini idäräse räise Rawil xäzrät Gaynetdingä dä möräcäğät ittem.

Bu xäbärne ul Törkiädä säfärdä waqıtında işetkän. Häm bügen ul Mäskäwdä oçqıç mäydanına çığuğa min añar telefon aşa möräcäğät itep, bu xälgä qarata nindi çaralar kürergä uylıysız, niçek añlatasız bu xälne dip soradım. Rawil Gaynetdin “Bu xällärne skinxedlar eşe dip kenä añlatu az. Berençedän bu rus şovinistları eşe. İkençedän, Rus provaslavie çirkäwe häm rus xökümäte alıp barğan säyäsätneñ çağılışı dide Rawil xäzrät.. Çönki, Kulikovo qırına bağışlap , bez tatarlarnı ciñdek dip ütkärelgän bäyrämnär ğadi xalıq öçen timer tayaqlarğa totınırğa färmän bulıp yañğırıy. Mondıy xällär bulmas öçen başqa millät, başqa din keşelärenä qarata alıp barılğan säyäsätne üzgärtergä kiräk. Soñğı waqıtlarda mondıy höcümnär yışaydı, läkin Rusiä möselmannarına qarata andıy xälneñ bulğanı yuq ide äle, dide Rawil Gaynetdin. Häm ul, bez bu xaqta Mäskäw ölkäse militsiä idäräsenä dä möräcäğät itäçäkbez, Rus provaslavie çirkäwenä dä möräcäğät itep, başqa dinnärgä qarata tolerantlıq turında üz fikerlären äytuen sorayaçaqbız, çaralar kürelüen taläp itäçäkbez , dide.

Näzifä Kärimova, Mäskäw

XS
SM
MD
LG