23 nçe oktäber könne şähär duması saylawlarında “batır” da bilgele bulaçaq. Seber tatar mädäniät üzäge dä, şähärdäge tatar tele uqıtıla torğan berdän-ber 15 nçe mäktäp tä taw astına urnaşqan. Şähärneñ taw astı öleşen ikençe törle tatar bistäse dip tä yörtälär. Yartısına yaqını tatarlar yäşi. Bil alışuçılar 15 nçe mäktäp mödire Säyet Xismätullin häm mädäniät üzäge citäkçese Säfiulla İl'yasov.
Seber tatar mädäniät üzäge mödire Säfiulla İl'yasov äytüençä, taw astı keşeläreneñ saylawğa barası kilmi. Şähär başlığı tormış xälen yaxşırtu öçen ber närsä dä eşlämägängä kürä, deputatlarnıñ närsä dä bulsa maytarasılarına ömetläre bötenläy süngän. Üzäk mödire üzeneñ saylaw aldı programmasın 12 bülektän tözegän. Berençe çiratta ul anda taw astı öleşen tönge döm qarañğılıqtan çığarunı, watılıp betkän yullarnı asfal't belän qaplatunı, qart-qorılarnıñ yortlarına ğaz kertterüne häm militsiä xezmätkärläreneñ bu yaqlarda da kürengäläp aluına ireşüne kertkän.
-Blagoustroystva net. Doroği v ujasnom sostoyanii. Problema s osveşçeniem, vodoponejeniem. Problema kommunal'nogo obslujivaniä.Mäktäp mödire dä bu problemalarğa bitaraf tügel. Anıñ programmasına da kergän. Säyet Xismätullin “Yedinaya Rossiä” äğzası. Xakimiättäge här kemneñ dä bu partiä qanatı astında buluı berkemgä dä ser tügel.
Tobol şähärendäge tatar mädäniäte başlığı süzlärençä, anı xakimiätkä çaqırıp söyläşkännär. “Sineñ saylanuıñ bezneñ öçen otışlıraq”,- dip tä äytkännär. Ämma mäktäp mödire belän dä şundıy uq söyläşü bulırğa mömkinlegen dä inqar itmi.
Säyet Xismatullin äytüençä, kem ütsä dä milli problemalar çittä yatıp qalmayaçaq. Ul mäktäp-mäğärif problemaların kütärsä, şul uq däräcädä mädäniät mäsälälärenä dä iğtibar itäçäk. Häm kiresençä. Urtaq kileşü şulay. Tobol şähär dumasına barlığı 25 kandidat saylanırğa tieş. Alarnıñ öçese tatar. Tağın berse: Gumanitar institut rektorı Rodion Räis ulı Barsukov. Ul ütmägän oçraqta da şähär dumasında barıber ber tatar deputatı bulırğa tieş.
Nail Alan. Tömän.
