Accessibility links

Кайнар хәбәр

Saylaw urınnarında öç törle äläm cilferdäde


17 oktäber könne Tatarstan prezidentı M.Şäymiev “İnterfaks” agentlıgında matbuğat oçraşuında bik möhim belderü yasadı. Rusiä häm tatarstan xakimiät orğannarı arasında wäkälätlär büleşü turındağı şartnamäneñ proyektı respublika parlamentına 27 oktäberdä kerteläçäk. M.Şäymiev äytüençä, xäzer inde bu proyekta kileşelmägän mäs'älälär qalmadı da diärlek. Ul bu atnada şartnamä proyektnı äzerläwçe ike yaqnıñ komissiä äğläläre belän oçraşaçaq. Respublika parlamentında raslağannan soñ bu proyekt Rusiäneñ Däwlät dumasına tapşırılaçaq.

Düşämbe könne Rusiäne sotsial' iminiät' fondı citäkçese, elekke premyer – ministr urınbasarı Ğalina Karelova kilde. Qazanda Rusiäneñ sotsial' iminiät' oyışmalarınıñ seminar kiñäşmäse başlandı.

Bu düşämbe ğädäti tügel, çinovniklar tawışsız – tınsız, küzläre qızıl, yözläre moñsu, çönki yäkşämbe könne cirle üzidarägä saylawlar uzdıru, xakimiät apparatında eşläwçelärgä bik zur imtixan. Saylawçılarnı meñlägän uçastokka kitertep häm tieşle keşene saylatıp, byulletennärne sanap häm dä näticälärne aldan küzdä totılğan kürsätkeç tärtälärennän çığarmaw bik küp köçne ala. Citmäsä şul uq duşämbe könne xalıqara fäqirlär köne ikäne kiñ cämäğätçelek belmäsä dä, yarlılıqnıñ barlığı berkemgä dä ser tügel. Däwlät xakimiätennän cirle üzidaräne ayırıp alırğa häm möstäkıyl' dönya kötärgä sälätle deputatlar rayon häm şähär başlıqları saylaw öçen soñğı berniçä atna buyı tırıştılar bit. Saylawğa ber kön qalğaç, xätta Tatarstan Prezidentı Mintimer Şäymiev keşelärne saylaw uçastoklarına kilergä, ör - yaña xakimiät strukturasın buldıruda qatnaşırğa çaqırdı.

İñ qurqınıçı saylawçılarnıñ bitaraflığı, passivlığı cirle üzidarägä elägergä teşläwçelär üzläre bik dulqınlansalar da, bu namzätlär awıl – şähärdä toruçılarnıñ yörägen cilketä almadı.

Mullıq yäki fäqirlek, yullar häm fatirlar teması ğına törle sotsial' qatlamnar wäkillären qızıqsındıra aldı. Näticädä, awılda yäşäwçelär ğädättägeçä kümäkläp saylawğa kilde, ä şähärdägelärneñ kübese munitsipal' xakimiätkä salqın qaradı. Qazan şähäreneñ İdel buyı rayonında saylawçılarnıñ öçtän bere genä uçastoklarğa kilsä, ä Aviatözeleş rayonında saylawçılarnıñ yartısınıñ ğına kilüe Qazanlılarnıñ käyefen açıq çağıldıra.

Ber xikmätle oxşaşlıq bar: Saylawğa kilüçelärneñ dä, yaña ippodromda at çabıştırtırğa cıyıluçılarnıñ az buluı. Ni öçen şundıy güzäl, mäxäbbät xalıqara at sportı kompleksına yäkşämbe könne “Tatarstan quboğı” yarışlarına keşelärneñ az kilüe ikençe mäs'lä. Ämma at çabıştırğanda häm deputatlar saylağanda da tribunadan qarap toruçılarnıñ az buluı häm alarnıñ käyef xıyalları bik möhim tügel, iñ möhime ciñüçelär bar, prizlar bülengän.

Qazanda yäşäwçelär moña qädär ber waqıtta da öç äläm tiräsendä tuplanğannarı bulmadı. Ä bu yulı uramnarda, saylaw uçastokların Rusiä, Tatarstan häm Qazan şähäre älämnär cilferdäde. Säyäsi intriga yasawçılar kemnär kübräk, şähär sovetına ütte, Mintimer Şäymiev keşeläreme, ällä Qamıl İsxakovnıykıylarmı dip baş wattılar. Xäzergä kem ciñelde, kem ciñde digän sorawğa cawap birüçe kürenmi. Bälki bu deputatlar isemlegen şähär häm respublika xakimiätendägelär tınıç yul belän astan ğına üzläre büleşkännärder, ä bälki yuq. Yaqın arada barıbız da şul turıda mäğlümat tuplarbız.

Rimzil Wäli

XS
SM
MD
LG