Yewropa Berlege üzendäge 25 äğza ilne qoş kizüe awıruı taraluğa qarşı köräş öçen citärlek darular buldırırğa çaqırdı.
Yewropa Komissiäse süzçese Philip Tod xäzerge daru tuplanmaları Berlekne qänäğätländererlek tügel dide.
"Berlekneñ sälamätlek komissionerı Markos Kyprianou barlıq äğza illärne kizü taralğan oçraqta viruslarğa qarşı köräşü öçen darularnı arttırırğa çaqıra" dide Tod.
Tod qayber äğza illär Dönya Sälamätlek Oyışmasınıñ viruslarğa qarşı darular xalıqnıñ 25 protsentına citärlek bulsın digän kiñäşen ütämäde dip belderde. Ämma Tod andıy illärne atap äytmäde.
Qoş kizüeneñ keşene üterä alırday H5N1 töre Törkiäneñ könbatışında häm Romaniäneñ könyaq-könçığışında tabıldı.
H5N1 2003 yıldan birle Aziädä millionnarça qoşnı häm 60-lap keşene üterde.
