Başqa töbäklärdä niçekter, bezdä milli-mädäni möxtäriätneñ yazmışı şaqtıy qatlawlı. İke yıl elek, eş cayğa salına başladı, üz binabız da bulaçaq dip torğanda ğına , räisebez – Mars Camal ulı İskändärov ülep kitte.Yaña räis saylarğa mäcbür buldıq. Bälki xäterlisezder, ul saylawlar qawğa belän uzıp, qıçqırışu- bozılışularğa kiterde. Şulay da şähärebezneñ iñ abruylı keşeläreneñ berse- “Lengazteplostroy trestı”citäkçese Nail äfände Kikiçewnı milli-mädäni möxtäriät räise itep saylıy aldıq.
İke yıl eçendä baytaq eşlär eşlände : binabıznı tözekländerep kerä aldıq, anda tatar, ğäräp tele kursları eşli başladı, veterannar öçen törle çaralar, yäşlär kiçäläre uzdıra başladıq. Millättäşlärebezneñ tüläwsez yurist konsul'tatsiäse alırğa, tabip-ortopedqa kürenergä, ramazan ayında awız açarğa yörü mömkinçelege tudı. Törle şähärlärdän, törle illärdän kilgän qunaqlar millättäşlärebez belän başlıça şuşı möxtäriät binasında oçraşa başladılar. Biredä “Nur” gäzite redaksiäsenä dä, Möxlisä xanım Zaripova cıyğan şaqtıy bay kitapxanägä dä urın tabıldı. Tizdän monda tabip- terapevt, nevropatolog qabul itä başlayaçaq. Bu ike yıl däwamında Nail Kikiçev citäklägän “Lengazteplostroy trestı”idaräse dä möxtäriätneñ filialı kebegräk buldı: eş, propiska kiräk bulğan,torır cire bulmağan keşelär, yärdäm sorap, Nail Ğusup ulına bara idelär. Şulay itep, atnanıñ ike köne möxtäriät eşlärenä kitä ide. Annan şunısın da äytmi bulmıy: bu ike yıl däwamında şähärdä tatar cämğiäteneñ abruyı da küzgä kürenep nığıdı. Xäzer Smol'nıyda bezneñ möxtäriät öçen işeklär härwaqıt açıq dip äytergä bula.
Problemalar da citärlek inde anısı: bina öçen arenda xaqı, kommunal' xezmätlär öçen tüläw bik zur. Matdi çığımnarnıñ iñ awırı , älbättä, Nail äfände Kikiçevqa häm anıñ yärdämçese Cämil Gıyniätullovqa töşä ide. Annan alar Peterburgnıñ 300, Qazannıñ 1000 –yıllığın ütkärü buyınça tözelgän koordinatsion sovetqa da kerä idelär. Añlaşıla ki, mäşäqätlär baştan aşqan. Yubileylar ütte, tartıp barğan yökne kimetsäk tä bula dipter inde, Nail äfände Kikiçev häm Cämil Gıyniätullov ictimaği eştän kitärgä bulğannar.
Bu mäs'älä möxtäriät sovetınıñ kiñäytelgän utırışında qaraldı. Kitü telägen Nail äfände yäşeneñ şaqtıy olı buluı, üze 40 yıl citäklägän trest xezmätkärläreneñ anı tağın 5 yılğa general' direktor itep saylawları belän añlattı.
“Çişmä” cämğiäte räise Änwär Säyetbağin : “Citäkçelärneñ yış alışınuı äybät tügel, ämma Nail äfändeneñ argumentları bik citdi, cibärergä telämäsäk tä rizalaşırğa turı kiler”,- dide. Ütkän räis saylawlarında tuğan bolğawırlıqnı iskä alıp, bu yulı fäqät qanun, ustav nigezendä eş itärgä buldılar- tatar ictimaği oyışmaları konferensiäsen cıyıp.(audio) Bu Bötendönya tatar kongressı başqarma komitetı äğzası, yubiley çaraları koordinatsion sovetı räise Şamil äfände Akbulatov buldı.
Saylaw turındağı barlıq mäğlümat “Nur “ gäzite aşa millättäşlärebezgä citkerelergä tieş. Konferensiägä çit keşelär, ütkän saylawdağı kebek çit şähärlärdän qunaqlar kilep eşne bozmasınnar öçen ictimaği oyışmalar delegatlarınıñ isemlege dä bastırıp çığarılırğa tieş.
Saylawlar fäqät ustav nigezendä ütärgä tieş , dip qabatladı Şamil Akbulatov, yuğisä Tuqay häykäle kebek kilep çığar: ber keşe, möselmannarda sın quyu bulmağan dip yazğan , 40 meñ tatar şuña qarşı tora almağan. Näticädä 3 yıl inde Tuqayğa urın taba almıybız.Xäzer dä, möxtäriät räisen berniçä keşedän torğan yabıq törkem saylağan dip äytüçe çığarğa mömkin.
Konferensiä 7 dekaberdä, härber ictimaği oyışmadan 5-är delegat çaqırıp, barlığı 60 –lap keşe qatnaşlığında uzarğa tieş. Annan ber atna alda, yäğni 30 noyäberdä, möxtäriät sovetınıñ tağın ber utırışı bulırğa tieş. Anda äle sovet täqdim itkän ike nämzätneñ-“Nur”gäzite baş möxärrire Rinat Mähdiev häm “Peterburg sabantuyı fondı”räise İrek Ğaliewnıñ programması qaralaçaq. Räislekkä başqa däğwä itüçelär bulsa, alarnıñ programmalarına da urın bireläçäk.
7 dekabergä bilgelängän milli- mädäni möxtäriät räise saylawları niçek uzar-bu turıda bez tıñlawçılarıbızğa söyläp işettererbez.
Gölzadä Kamalova, Sankt- Peterburg
