Accessibility links

Кайнар хәбәр

Soñğı 15 yılda Tatarstanda 50 meñnän artıq migrant terkälgän


Bu yılnıñ 9 ayı eçendä Tatarstanda 52 meñnän artıq çit il keşese terkälgän, 20 meñ migrant administrativ cawaplılıqqa tartılğan. Bik ozaqqa suzılğan röxsät käğäzen alu eşläre, toraq, eş kebek mäs'älärdä bilgesezlek bulğan şartlarda yäşäwçe çit il keşeläre üzlären çınlap ta çit, yat keşe itep xis itä başlıy. Ä bit bu keşelärneñ kübese qayçandır urtaq il - Sovetlar Soyuzı grajdannarı bulğan. Tatarstandağı migratsiäneñ xäle turında respublikanıñ Eçke eşlär ministrlığı migratsiä eşläre buyınça İdärä başlığı Nikolay Vladimirov söyli:

Elek Tatarstan awıllarında här ğailädän kemder Üzbäkstanğa küçep kitkän bulğan. Sovetlar Soyuzı tarqalğaç, alarnıñ kübese kire qayttılar. 90 yıldan başlap, bügenge köngä qädär respublikağa Sovetlar Soyuzı illärennän 50 meñnän artıq keşe qayttı. Şularnıñ 74%tı tatarlar, 10%tı ruslar, qalğanı başqa millät wäkilläre. Qızğanıçqa qarşı bügen, qaytırğa teläwçelär sanı kimi. Xäzer Rusiädä dä, Tatarstanda da başqa törle migrantlar - eş ezläp kilüçelär. Bolar arasında inde tatarlar bik yuq.

Küçep kilüçelärneñ sotsial' mäs’älälären xäl itü öçen Tatarstannıñ milli-mädäni moxtariätlär Assotsiatsiäse häm respublikanıñ eçke eşlär ministrlığı urtaq eşçänlek alıp barırğa bulğannar. Tatarstannıñ milli-mädäni cämğiätlär Assotsiatsiäse bu mäs'älädä bik faydalı eşlär başqara. Rusiä prezidentınıñ İdel buyı federal' okrugınıñ tulı wäkälätle wäkile yärdämçese Aleksandr Pıkov äytüençä, Rusiädä migrantlar belän eşläwçe mondıy sotsial' institut berdän ber häm ul Tatarstanda. Säğit Jaksıbaev citäklägän bu Assotsiatsiä respublikağa küçep kilüçelärgä sotsial' häm xoquqi yärdäm kürsätä.

Aleksandr Pıkov äytüençä, çit ildän kilgän eşçelärne zakonlı terkäw, eşkä urnaştıru mäs’äläläre bigräk tä küp waqıtnı ala. Küp kenä oyışmalar çit il watandaşları belän eşlärgä bik aşıqmıy. Ğomumän, Rusiäneñ zur şähärlärendä migratsiägä qarşı säyäsät küp oçraqta xuplana ikän. Monıñ säbäben Rusiä zur aqçalar yuğaltuı häm xoquqlarnıñ bozıluı belän añlatalar. Bügen Rusiäneñ küpme aqçalar yuğaltuı turında tögäl mäğlümat yuq, dide Aleksandr Pıkov, ämma äytergä bula migrantlar yıl sayın Rusiädän 15mlrdqa yaqın aqça alıp kitä. Bu aqçalarnı eşlägändä alar millionlağan salımnarnı tülämiçä qala.

Tatarstanda migratsiä mäs’äläsenä qağılışlı problemalar äle bik küp. Sişämbedä respublikanıñ eçke eşlär ministrlıysında ütkän kiñäşmädä älege problemalarnı xäl itü yulların ezlädelär. Bu kiñäşmäneñ täqdimnäre yaqın kiläçäktä Rusiä räsmilärenä cibäreläçäk. Respublikada keşe xoquqları öçen cawaplısı - ambutsman, Tatarstannıñ atqazanğan xoquq belgeçe Räşit Vägıyzov söyli:

Küp millätle Tatarstanda xalıqlar bik äybät, tatu yäşilär. Şulay da problemalar äle bik küp. Şunıñ öçen Mäskäwdä çit il eşçeläre häm watandaşlıq alu mäsäläse buyınça programma buldırırğa kiräk. Bügenge kiñäşmäneñ täqdimnären bez Rusiä räsmilärenä cibäräçäkbez. Migrantlar isä Rusiägä kiräk. Çönki Rusiädä xalıq küp ülä bügen. Putin da äytkän bit, Rusiäne tuğan cire itep sanağan härkem monda qaytırğa, yaxşı itep yäşärgä tieş.

Al'bina Zäynulla

XS
SM
MD
LG