«Berdäm Rusiä» firqäseneñ Tatarstan bülegendä, ilkülläm proektlarnı tikşerü buldı. Bu utırış, törle-törle ictimaği oyışma wäkilläreneñ cıyılışı dip iğlan itelsä dä, anda «Berdäm Rusiä» firqäseneñ Tatarstan bülege qarşında oyıştırılğan Konsul’tativ Şura wäkilläre genä qatnaştı. Utırış, «Berdäm Rusiä» firqäseneñ Tatarstan bülegendä ütkärelde. Anda ilküläm proyektlar xaqında fiker alışu bulaçaq, dip iğlan itelde. Utırış başlanır aldınnan uq, Konsul’tativ Şura başlığı Şamil Qaratay, tübändäge belderü yasadı. Xäzer ictimaği oyışma wäkilläre ilküläm proyektlarğa teläktäşlek kürsätüe turında çığış yasayaçaq, dide. İctimaği oyışma wäkilläre, ğalimnär, Rusiä Prezidentı täqdim itkän ilküläm proektlarğa teläktäşlägen belderdelär, ämma tabiplarğa, ğalimnärgä eş xaqın kütärü, kübräk külämdä bulsın ide, didelär. Utırışta qatnaşqan sälämätlek saqlaw, mäğärif, awıl xucalığı, tözeleş ministrlığı wäkilläre dä älege proyektlarğa läbäykä dip utırmadı. Sälämätlek saqlaw ministrlılığı wäkile, älege proyektlarnı niçek itep tormışqa aşıru kürsätelmägän, ul açqalar yuğalıp qalmasmı, dip borçu belderde. Ul şulay uq, xokumätneñ iğlan itelgän iñ zamança klinikalar tözü wäğdäsenä dä, şik belderde. Tatarstan inde 7nçe yıl 1 diagnostika üzägen tözep mataşa, dide ul. Finanslar citmi, ämma aña aqçanı federal büdjettan alır öçen, ul üzäkneñ federal qaramaqqa küçerergä kiräk ikän. Üzäk regional meditisina oyışmalarına yärdäm itmi. Mäğärif ministrı urınbasarı, fännär kandidatlarınıñ eş xaqların 2 meñ, ä doktorlarnıqın 4 meñgä kütärü, yaxşı närsä, ämma anıñ belän genä, yäşlärne fän belän şöğellänergä qızıqtırıp bulmas, dide ul. Sıynıf citäkçesenä östämä 1000 sum tüläp kenä, uqıtuçınıñ xälen yaxşırtıp bulmas, çönki kommunal tüläwlärneñ, bäyälärneñ artuı belän mäğärif xezmätkärläreneñ tormış däräcäse tübängä tägäräde, dide ministr urınbasarı. Rusiä xökümäte wäkilläreneñ, uçastok tabiplarınıñ eş xaqların 10meñgä, şäwkät tutaşlarnıqın 5 menğä genä qädär genä kütärü, meditsina ölkäsendä genä tügel, başqa tarmaq wäkillärendä dä qänäğätsezlek tudırğan. Menä mädäniät xezmätkärläreneñ hönär berlege başlığı Rayat Ğäliev şul xaqta söyläde.
Utırışta qatnaşqan, «Berdäm Rusiä» firqäse wäkilläre häm Duma deputatları, xökümät aldında älege mäsälälärne kisken quyaçaqbız, dip belderdelär. Deputatlar bu il küläm proyektlarnı yaxşı itep tormışqa aşırılsın öçen, xökümätneñ eşçänlegen kontrol astına quyabız, dip bik borçılu qıäfättä belderülär yasadı. Axırdan, cıyılışta qatnaşuçılar, firqäneñ başlanğıçın, yäğni ğalimnärgä, meditsina xezmätkärlärenä eş xaqın berniçä tapqırğa kütärüne xuplıy, digän käğäzgä qul quydı.
Bikä Timerova.
